Midway-in sum la lut hnem ber
Box Office-ah roreltu thar a awm a, chu chu Midway a ni. Doctor Sleep chuan dawtin pahnihna a ni a, Playing with Fire chu pathumna a ni ve bawk.
Midway chu
American indo film a ni a, Pearl Harbor beih behchhana siam niin, Indopui pahnih laia Battle of Midway behchhana siam a ni.
He film-ah hian a changtute pawh an hrawl hlawm hle a- Ed Skrein, Patrick Wilson, Luke Evans, Aaron Eckhart, Nick Jonas, Mandy Moore, Dennis Quaid, Tadanobu Asano leh Woody Harrelson-te anni hlawm a, sum lalut tam ber a ni pawh hi a mak lo.
November 8 khan Lionsgate chuan he film hi tlangzarhin, US-ah chuan theatre 2,242 aṭangin $17,897,419 a lalut a, kar tawpah khan film thar ṭha tak tak chhuak zingah a chungnung ta ber a ni. Hetihlai hian an film budget chu $mtd 100 a ni thung a, khawvel puma a sum lakluh tawh zat chu $mtd 38 bawr vel nia chhut niin, an budget a sang bawk a, an la pha lo hle thung.
Doctor Sleep leh Playing With Fire
American horror film, 2013-a Stephen King lehkhabu ziah Doctor Sleep behchhana siam hi US-ah chuan sum lalut tam ber dawttu a ni a, $14,114,124 a lalut a ni.
Playing With Fire chu sum lalut tam ber pathumna niin, $12,723,781 a lalut ve bawk a, he American family comedy film hi John Cena channa a nih bawk avang en chaktu an tam ngei ang.
Last Christmas
Last Christmas tih hming hi chu Mizo-te zingah pawh a mikhual lo hle. Game of Thornes star Emilia Clarke channa romantic comedy film hi Box Office-ah palina a ni a, naktuk hian United Kingdom lamah an tlangzarh dawn chauh thung. Krismas a hnai chho zel bawk a, he film hi a hit chho zel tura ngaih a ni.
Chart hmasaa pakhatna Terminator: Dark Fate chu pangana niin, a kar hnihnaah ngam loh a ngah nghal hle. Joker pawh hun eng emaw chen a lal hnuah tunah chuan paruknaah a tla thla ve ta thung.
Film thar hmuhnawm a tam
Box Office-ah film thar paliin top 4 thleng an hauh nghal ṭhawt thei a, hei hian film thar hmuhnawm a tam zia a tarlang. Top 10-a film thar langte hi sum lalut tam paliah an lang thei nghal vek a, hetiang hun hi a thleng khat hle. Top 100 chinah phei chuan 24 zet film thar lang phak an awm a ni.