Ip Man film tawpna ber tur December-ah

Hong Kong biographical martial arts film, Ip Man 4: The Finale chu December 20-a tlangzarh tura ruahman a ni. Martial arts ngainatu tam tak te chuan chhuah chhunzawm zel duh mah se a film siamtu lamin hei bak hi Ip Man film an siam tawh dawn loh thu an sawi. Ip Man film hi Chinese martial artist 'Ip Man' chanchin zul zuia siam a ni a, Ip Man 4-ah hian a tir aṭanga a chang­tupaa an hman, Hong Kong actor Donnie Yen bawk hman leh a ni. 

Kum 2006-a tihchhuah Undisputed II: Last Man Standing film-a misualpa insual thiamzet mai, Yuri Boyka tia kan hriat, a hming tak erawh Scott Adkins pawh he film-ah hian misualpaah a chang a, a tawpah Ip Man nen an insual hmel bawk. 

Shaolin Soccer film aṭanga kan hriat lar Bruce Lee ang em em, goal keeper ṭha zet mai Danny Chan kha he film-ah hian Bruce Lee lemah a chang ang. "Father of mixed martial arts" tia khawvelin a chhal Bruce Lee khan kum 16 a nih in Ip Man hnenah hian Wing Chun a zir a ni. He film-ah hian Long Beach International Karate Championships 1967-a Bruce lee-a'n 'one inch punch' leh 'demonstration' a show hrang hrang pawh kan hmu nawn leh dawn.   

Ip Man film hmasa ber hi kum 2008 khan tihchhuah a ni a, Ip Man 2 (2010) leh Ip Man 3 (2015)-te pawh tihchhuah a lo ni tawh bawk. Mizote pawhin hmuhnawm kan ti hle hlawm ṭhin a nih kha, Boyka chang tel tur hian mi tam tak chu a tiphur zual ngei ang. Ip Man film hmasa ho direct-tu, Hong Kong filmmaker leh screenwriter lar Wilson Yip bawkin a direct leh dawn. Scriptwriter atan hian Edmond Wong hman a ni a, Raymond Wong chuan a produce bawk ang. A film budget pawh a sang a, $maktaduai 52 vel lai a ni.

Ip Man hi Chinese kung fu style 'Wing Chun' zirtirtu lar tak a ni a, police officer a ni bawk. Khaw­vela Wing Chun style theh lar bertu a ni ti ila kan sawisual tam awm lo e. 

Kum 9 a nih aṭangin Chan Wah-shun hnen aṭangin Wing Chun hi a zir a, Chan-a student hnuhnung ber a ni. Wing Chun hi self-defence lam hawi martial art a ni a, kut an hmang nasa hle. Wing Chun style hmu­chhuaktu hi Ng Mui nia sawi a ni a, Qing Dynasty hunlai kum 1647 bawrvela Shaolin Temple tihchhiat a nih a, dam khawchhuak unau panga 'legendary Five Elders'-te zinga mi a ni.