Ṭhazual Award nge nge - a ropui e

Ṭhazual Award 2019 chu Ningani zan khan Dawrpui Multipurpose Hall-ah ropui taka sem a ni a, category 11-ah award sem a ni. Kimkima chuan award ngaihhlut pahnih, Best Songwriter leh Best Male Artist Lengzem a dawng a, award pahnih la thei awm chhun a ni bawk.

Ṭhazual Award programme hi zan dar 8-ah ṭan niin, red carpet-a hun hman erawh dar 6.30 aṭangin ṭan a ni thung. A hmuna kal thei lo tan Zonet HD leh YouTube lama live-a pekchhuah niin, entu an ṭhahnem hle. Programme a 'boring' lo a, performance zawng zawng a hmuhnawmin a pui em em vek a ni.

Zai tam zawka live music hman a ni khan music-a kan hmasawnna a lantir. Kum tam vak lo liam taah kha chuan zaithiamte khan programme zawng zawng deuh thawah khan music track an hmang kha a ni a, Ṭhazualah erawh performance tam berah live music hman a ni a, inbuatsaih hautak deuh mah se rimawi ngainatute tan a mi deh dan a dang ṭhin.

Rini Hlondo chuan thiam tak mai leh zangkhai takin prog­ramme a kaihruai leh a; milar kalkhawmten kan desig­ner neih ṭhatte kutchhuak an inbel hlawm a, hmuh an nuamin designer-te kuthnu a mawiin danddai tak takte pawh a awm. Ṭhazual Award hi Zonet Cable TV hian kum 2015 aṭang khan MDM artist-te tan a buatsaih ṭan a, kumin hi a kum ngana a ni tawh a ni.

Best New Artist Gospel chu Zela Chuau­ngo hnenah hlan a ni a, Mizo Idol star Ticoc Dara chuan Best New Artist Lengzem a dawng bawk.

'Rimawi Ram, Lentupui leh Darmani zai' mawi taka medley-tu Seraphic Choir-te chuan Best Duo/Group an dawng bawk. Best Duo/Group category-a awmte hi an ṭha hlawm hle a, hla lar tak tak sate an awm hlawm a ni.

Best Mizo Traditional Artist chu Marina Varte hnenah hlan a ni a, ani hi helam hawi album siam ngat kha a ni a, a phu hle.

Hla phuah thiam ṭha tak tak karah Kimkima chuan Best Songwriter a dawng a, ani hi Ṭhazual award-ah a chet ­ṭhat a kaltluang. A hlawhtlinna belhchhah turin Best Male Artist Lengzem a dawng leh a, nikum lamah pawh khan he award hi a la tawh bawk.

'Mawi tawp berin' tih hla phuahtu leh thiam tak maia sa chhuaktu H. Lalrem­ruatin (Maruati) chuan Best Female Artist Gospel a dawng. Ani hian tunlai hian 'Mawi tawp berin' hi a larpui hle a; Ṭhutmuan Rimawia 'Kraws Kawng' a sak pawhin ngaihthlak a hlawh nasa leh hle bawk nen, Best Female Artist Gospel a dawng hi thil awm tak a ni.

Zorinzuali Khiangte chuan Best Female Artist Lengzem a dawng a, Best Male Artist Gospel award chu Hmingtea kutah hlan a ni bawk. Amtea chuan a hla 'Lunghlu' hmangin Best Music Video Gospel award a dawng a, Ṭhazual award-a cheṭha ṭhin tak Feli Fanai pawhin  a music video ' Leng dang tang a bel' hmangin Best Music Video Lengzem a dawng ve leh bawk a ni.

Performance zawng zawng a hmuh­nawm - inbuatsaihna a ṭha a, chutih rualin a hautak takzet ang tih a chiang.

Priscilla Fanai chuan show hawngin, Hlimhlimi'n mawi tak maiin 'Inenfiah rawh' tiin a chhunzawm a, rock band perform awm chhun The Prophets-ten an hla thulkhung 'Mangang authawm' hmangin kalkhawm mipuite an awi tlei zui.

Josephine Lalawmpuii leh a ṭhianten 'Khep khep maia' an perform bawk a, mipui lawm an hlawh hle.

Maruati leh Fiona Pachuau-ten Pathian hla mawi tak mai hmangin mipui an awi ve thung. Boruak a inthlak a, a dancer hot takte leh Essy an inlar a, 'Kan hawikir lo'ng' hmangin mit leh beng a titlai hle. Manuna'n a hla thar tur min tem lawktir a, Zorinzuali Khiangte leh Seraphic Choir-te pawh an che ṭha. Jaui pawhin Manuna ang bawkin a hla thar  a rawn thlawh a, a stage performance hmuhnawm tak lantir lehin mit leh beng a tlai hle a ni. Rpa Ralte leh G'Nie-ten a tawp an khar - a hmuhnawmin a ngaihnawm vek.