Dj Lalvenhimi hla thar 'Ka Dawn Lungruk'

Ṭhazual Award ṭum thum lai dawng tawhtu Dj Lalven­himi chuan Ningani khan music video thar 'Ka Dawn Lungruk' tih chu a tichhuak. He hla hi a musical film leh album a tihchhuah tawh 'Ni thar duhawm' ami a ni a, Lalrindiki (Delta sound) phuah niin a pasal CL Para tana a phuah a ni nghe nghe. A thluk hi Bruce Pachuau siam a ni a, Dj-i hian a sa thiam bawk a, a mawi hle.

Music Video hmuhnawm taka siam niin, Dj-i YouTube channel lamah upload a ni a, zankhat thil thuah mi sing thum dawnin an thlir hman. Video hmuhnawm tak mai hi photographer lar tak Jeremy Hauhnar direct a ni a, ani hian engkim buaipui sakin a chungah hian Dj-i pawh hi a lawm hle a ni. Video-ah hian Andrea Hlondo leh Hriatpuia-te chu model-ah hmangin anni pahnih hi zei takin an inchhai velin a tawpah phei chuan an innei hial. Recording hi Kings & Pro­phets-a a tih a ni a, music hi The Breeze-te buaipuisak a ni bawk.