ṬHAZUAL LENGZEM Teawmi 'Facebook' hun a thleng ta

Ṭhazual lengzem chart-ah Teawmi hla thar ber 'Facebook' in ro a rel a, Dj Lalvenhimi 'Ka dawn lungruk' chu pahnihna niin RPA & Rinhlui Pialtu 'Lokir leh mai rawh' chu pathumna a ni bawk.

Ṭhazual chart uluk taka enṭhin chuan Mizo Idol star Teawmi hla thar ber 'Facebook' mikhual tawh lo zia leh chart-a dinhmun sang luah rei tawhtu a nihzia an hre ngei ang.

Top 5-ah pawh hun eng emaw chen a lang tawh a, chart hmasaah khan pathumna niin chart thar berah erawh tluk zo an awm ta lo a, pakhatnaah a rawn invawrh ta a ni.

Teawmi hian 'Facebook' hi nikum kum tawp dawn hnaiah khan a tichhuak a, Ṭhazual chart-ah pawh hian a lang nghal vat a ni. He hla hi Bchi phuah a ni a, music hi Lal K Sailo siam niin a video hmuhnawm tak hi Chiangtea Videography kutchhuak a ni thung. Teawmi hian a sa thiam bawk a, No 1 a ni thei hi a mak lo hle.

Chart hmasaa pakhatna DJ Lalvenhimi 'Ka dawn lungruk' chu pahnihnaah a awm ve thung a, RPA & Rinhlui Pialtu 'Lokir leh mai rawh' chuan hma sawn zel thungin pathumnaah an rawn inhlangkai der tawh. A mimal ve ve pawhin Mizo-in artist kan neih ṭha ber ber zinga mi anni a, hma an sawn zel pawh hi a mak lo a, an dinhmun an sawh nghet mek zel a ni.

Pakhatna dinhmun hial pawh luah tawhtu Jaui 'Lo hnai la' chu palinaah a awm ve thung a, Jaui pawh hi chart luahlumtu ber pakhat a ni a, Top 5-ah a la lang phak hian a hla hi miin an la ngaithla kham lo hle tih a hriat theih awm e.

Aziri chuan 'Ka thlang ber che asin' hmangin Top 5 a khar ve thung.

Tunṭum Ṭhazual chart-ah hian thil thar em em a awm lo a, char hmasa aiin a danglamna a tam lo hle a ni.