Tuirial Jail

December 5-a tlang­zarh tura rua­hman, Mizo film thar 'Turial Jail' chu har­satna a awm avang­in tlangzarh hun sawn hlat a ni a, nakkum January thla chawhma lamah tlangzarh tum a ni. Mizo history-a hmun pawi­mawh tak luah reng tawh tur, October 7, 1979-a Tuirial Jail aṭanga tangte tlanchhuah dan chanchin ngaihnawm tak chu he film 'Turial Jail'-ah hian tihlan a ni a, a hmuhnawm dawn tih a chiang.

Tuirial Jail hi Lal Hmingtea Fanai (Milestone Picture) direct a ni a, Chamte graphic-te leh VFX lam buaipuitu Sawma-te nen an thawk ho. 

"He film hi sum leh pai tam tak senga siam a ni a, zawhna kan dawng tam deuh a, YouTube lamah a full movie upload kan tum lem lo," tiin Hmingtea hian Vanglaini a hrilh. Tlang­zarh a nih hunah erawh veng hrang hrangah chhuah kual an tum thung.

Kum 2013 vel aṭanga buaipui ṭan a ni tawh a, a hautak em avangin an puitlin mai thei lo a, 2018 khan hma la ṭan lehin an puitlin dawn hnai ta a ni. Rambuai laia thil thleng a nih avangin a hunlai ang thei ang ber tura chan a ni a, a changtu mipa lam pawhin an sam an zuah a ngai hial. Tuirial Jail hi a taka hmuh tur a awm tawh loh avangin a tak ang tur jail dang sak a ngai a, lei verh dan zawng zawngte nen a hauhtak hle ngei ang.

A 'script' hi Sangzuala Pachuau buaipui niin, Jail aṭanga tlanchhuakte  biak kual bakah lehkhabu hrang hrang a rawn a ni.

Tuirial, National Highway 54 bula awm ṭhin a ni a, Airfield panna kawng hmar lamah a awm ṭhin. Mi 60-70 vel lenna niin, rambuai lai khan Mizo ṭhalai eng emaw zat an tang a, a tam zawk hi Political Prisoner, MNF mi leh sa an ni.

Tang tlanchhuak zingah hian mi pakua an la dam a, lei verhnaa inhliam chhuak ve thei lo pakhat a la dam bawk.

He film hi pawl leh mimal tan sum tuak nan a hman theih a, 90891 96591-ah ngaihven theih a ni.