Queen Live Aid 1985 set list Fire fight Australia concert-ah

Live Aid 1985-a Queen performance kha mi tam tak tan chuan khawvela life performance ropui ber a ni a, kum 35 zet liam tawh mah se vawiin ni thleng­in huhang a la nei reng. Kum 2018-a Freddie Mercury biopic 'Bohemian Rhapsody' film tihchhuah khan Live Aid 1985 boruak a rawn chhem alh ṭha leh ti ila kan sawi sualin a rinawm lo.

Pathianni khan 2019 kum chawhnu lam aṭanga ram kang nasa tak tuartu Australia mipuite chhawmdawlna tur Fire fight Australia concert neih a ni a, hetah hian Queen + Adam Lambert chuan Queen Live Aid 1985 set list ang chiah kha an rawn perform leh a, a hmuna kal mipuite chu an sahawk a ni ber. Media hrang hrang pawhin an chhuah uar hlawm hle a ni. 

YouTube lamah an perform-na video hi en tur an dah chhuak nghal a, Freddie Mercury fan-te rilru a chawk tho thar ngei ang le.

Freddie awm tawh lo mah se a ai awhtu tura Queen-in an hman ṭhin Adam Lambert performance a ṭha a, screen-ah Freddie hlim thla rawn langin mipui a rawn "Ay-Oh" pui vel chu mipui pawhin nuam an ti hle tih a hriat.

Queen hian a hmain 'We Will Rock You' leh 'We Are the Champions' te chu an sa dawn tih sawi lawk mah se Live Aid 1985 set list an rawn play ta hi mipuiin an lawm hle.

Bohemian Rhapsody hmanga bul rawn ṭanin Radio Gaga-in an zawm a, Live Aid 1985-a Freddie Mercury mipui chawh hlimna "Ay-Oh" te pawh telh leh thlapin Hammer to Fall leh Crazy Little Thing Called Love an sa bawk. An puanzar lawk angin 'We Will Rock You' leh 'We Are the Champions' hmangin an performance hi an khar a ni.

Fire fight Australia concer hian darkar 10 zet a awm a, zaithiam lar hrang hrang an perform a ni. Alice Copper pawh he hunah hian inlanin, 5 Seconds of Summer, Ronan Keating, Michael Buble leh Olivia Newton John-te bakah midang eng emaw zat an inlan.

He concert-ah hian $mtd 9.5 vel an hmuchhuak nia tarlan a ni bawk.