Wonder Woman ngam loh The Marksman

Box Office-ah kar thum chhung lai ro a rel hnuah Wonder Woman 1984 chuan ngam loh a tawng ta a, Liam Neeson channa The Marksman chu sum lalut tam ber rawn niin Wonder Woman rorel hun a rawn titawp ta a ni.

The Marksman hi January 15 khan US-ah tlangzarh a ni a, crtitics lam chuan Liam Neeson chetla vel an fak lehpek hle.

Action thriller film a ni a, Liam Neeson hi US Marine retire Jim Hanson lemah changin Arizona- Mexico ramriah dan loa ramri kan tumte report ṭhintu a ni. Ni khat chu patrol-a a chhuah laiin Mexican nufa, Rosa leh Miguel, cartel lak aṭanga tlanchhia tawngin, hemi hnu hian cartel member ṭhenkhat nen an inkap zui a, Rosa chu an kah hlum tak avangin Hanson chuan Miguel chu a chhungte hnenah hruai a tum ta a ni.

Action film ngaina tan chuan film hmuhnawm tak a ni ngei ang. Kar tawp liam taah khan theatre 1,975-ah pe chhuakin $3,705,000 a lalut a, North America Box Office-ah pakhatna a ni.

Kar thum chhung lai Box Office roreltu ni thei Gal Gadot channa DC movie Wonder Woman 1984 chu pahnihna a ni ve ta a, $2,600,000 a la lut a ni. 

Wonder Woman hian khawvem pumah $142,500,000 a lalut tawh a, an bugdet la pha lo mah se hripui len hnua film tlangzarh zinga sum lalut tam pawl tak a ni tho. North America Box office aṭangin $35,800,000 a lalut tawh.

Box Office top 10-ah The Marksman tih loh film thar dang hmuh tur a awm lo. Pathumna chu chart hmasa lama pahnihna The Croods: A New Age kha a ni a, News of the World chu palina niin Monster Hunter chu pangana a ni.

Box Office Mojo phei chuan chart a tihchhuahah film 16 chiah a tarlang a, chutah chuan The Marksman bakah hian chart-a inlan thar pahnih chiah a awm a, 15-na MLK/FBI tih leh 16-na Bloody Hell-te chu film thar an tarlan a ni. Hripui leng a reh hma chuan film thar lian tham kan hmu lawk rih dawn lo a nih hmel. 

Film tam tak tlangzarh hun an sawn hla zel a, kumin chhung hian hrileng a ziaawm a nih loh chuan nikum lam ang bawkin Box Office a lun leh vak lo mai thei a ni.