Peaky Blinders season 6-ah a tawp dawn

BBC drama hit tak 'Peaky Blinders' chu season six thleng siam a ni dawn a, mahse creator leh writer Steven Knight chuan a thawnthu erawh kawng danga chhunzawm a tiam thung.

Series lar tak, en hlawh tak Peaky Blinders hi season five thleng siam a ni tawh a, Tommy Shelby (Cillian Murphy) leh an chhungkaw chanchin rorum tak tarlanna series hi Thawhṭanni khan a tawp dawn tawh tih BBC chuan an tichiang tawh a ni.

Kum 2019 khan Knight chuan Entertainment Weekly hnenah Peaky Blinders chu season seven thleng siam a ni dawn tih a lo sawi tawh a, hei vang hian Thawhṭannia BBC thuchhuah hian mi tam tak a ṭhawng mai thei.

Thawṭannia season six thleng chiah siam a ni dawn tih puan a nih rual hian season six production an ṭan leh tawh tih erawh tarlan a ni a, kumin kum tawp lam emaw nakkum kum tir lamah emaw chuan kan en leh hman mahna.

Crime drama television series hi September 12, 2013 aṭanga tihchhuah tawh kha a ni a, Indopui I-na zawh hnua Tommy Shelby leh a chhungkaw chanchin hi phuahchawp mah ni se thil tak tak thleng behchhana siam a ni tho thung. August, 2019 khan season five pawh pek chhuah a ni leh tawh a, UK-ah chuan season five ringawt pawh hi mi maktaduai 7.2-in an en anga chhut a ni.