HONTRADE INTERNATIONAL ṬHAZUAL FAKNA-AH Lalhmangaihzuali 'Hremhmun' A sang ber

Hontrade International Ṭhazual Fakna chart-ah Lal­hma­ngaihzuali (Nunui) hla 'Hremhmun' chu pakhatna a ni a, Lalthlengliani 'Johova Elohim' chu pahnihna niin Sanga Renthlei ft Hlimhlimi 'Ni ropuiah chuan' chu pathumna a ni bawk.

Ṭhazual award sem zawh taka nomination pahnih hmu thei tlemte zinga mi Lalhmangaihzuali 'Nunui' chuan a hla thar ber 'Hremhmun' hi PB Lalbiakzuala phuah a ni a, Ṭhazual fakna chart-ah hian a mikhual tawh lo hle.

September thla tir lama a tihchhuah kha niin, a tihchhuah aṭanga rei vak loah Ṭhazual Fakna chart-ah hian a lang nghal a, chart luahlumtu ber pakhat a ni zui nghal. Hma sawn chho zelin chart hmasaah khan pahnihna a ni a, tunah erawh dinhmun ṭha berah a ding ta a ni.

Recording hi Kings and Prophets Studio-a a tih a ni a, music hi Victor Vanlalhruaia kutchhuak a ni thung. A music video pawh hi a hmuhnawmin a changkang hle a, Ṭhazul award-ah pawh khan Best Music Video Gospel category-ah nomination hmu thei a ni.

Chart hmasaa pathumna Lalthlengliani 'Jehova Elohim' chu pahnihnaah a rawn inhlangkai ve leh bawk. 'Jehova Elohim' hian chart-ah hma a sawn zel a, a dinhmun a sawh nghet mek zel a ni. Sanga Renthlei ft Hlimhlimi 'Ni ropuiah chuan' chu pathumna a rawn ni ve leh bawk. He hla mawi tak mai hi an tihchhuah aṭangin thla khat vel chauh a la liam a, a dinhmun erawh a ṭha chak hle thung.

Ruatpuii 'Ka lawm e Lalpa' chu palina niin, chart hmasaa pakhatna Sawmtea 'A va mak em' chu panganaah awmin, top 5 khartuah a ṭang a ni.