Various artist-te'n Krismas hla tichhuak dawn

Zaithiam rual - Joseph Lalthanpuia, Lalbiakkima (Bka) , C.Lalrinzuala (Amtea), Liandingpuii, Zoramchhani, Lalremruati (Naemi), Lalruathlui (Hlutei) leh VL Neihthangi (Nunui)-te chuan Various Artist tih hmingin Krismas hla thar an tichhuak dawn.

Hla thar tichhuak turte hi zai mi zingah pawh inkawm leh inpawh deuh bik, a chhia a ṭhaah pawh inngaihsak tawn tak tak niin, 'BAE' tia inko ṭhin zinga mite an ni. Mahse video an siam tharah hian member-te hi an kim theih loh avangin, various artist tih hmingin an siam ta zawk a ni. 

Krismas hla an tihchhuah tur hi Rinawma (Alpha Recording) phuah, 'Fak Rawh U' tih a ni. Kings and Prophet-ah record niin, video hi BS Picture-in a siam a ni. Video pawh peihfel thawkhat tawh niin, kar tawp lama tihchhuah hman ngei an tum. 

Music video an siamna kawngah hian an member pui - Liandingpuii, Hlutei leh Nunui-te pasalte leh chhungte'n theihtawpa an puih avangin Various Artist hmingin lawmthu an sawi nghal a, a hla saktirtu Rinawma chungah pawh an lawm takzet tih an sawi.