Box Office Ford v Ferrari a tlanchak fal

Box Office-ah roreltu thar an awm a, chu chu kar liam taa US-a tlangzarh thar Ford v Ferrari a ni. Kar hmasaa pakhatna Midway chu pahnihnaah la awmin, film thar Charlie's Angles chu pathumnaah an awm bawk.

August 30 khan Telluride film festival-ah premiere a ni tawh a, lawm a hlawh hle. Zirtawpni liam ta khan US-ah tlangzarh a ni a, a hit nghal hle a, a sum lakluh pawh a tam hle a ni. Matt Damon leh Christian Bale channa Ford v Ferrari hi American sports drama film a ni a, car racing lama tui tan chuan en hmaih phal chi a ni lo ang. 1960 chho vela Ford, Ferrari leh Fiat dinhmun vel hmuh theihin a awm a, car lam tuipuitu tan chuan film hmuhnawm tak tur a ni bawk.

Thil tak tak thleng behchhana chan a nih avang hian mi tam tak chuan an hlut hle tih a hriat a, Damon leh Bale-te'n an lem an chan Carroll Shelby leh  Ken Miles-te pawh hi 1960 chho vela car khalh thiam larte an ni. Theatre 3,528-ah kar tawpah khan chhuah niin $31,474,958 zet an lalut a, an dawt chiaha awm Midway hian $8,505,531 chiah lalutin an inthlauhna hi a tam hle a, hei hian Ford v Ferrari hit zia a lantir awm e.

Khawvel pum huapa a sum lakluh tawh zawng zawng chu $mtd 53.6 a tling tawh a, film siamna atan an budget dah erawh $mtd 97.6 daih a nih avangin an la phak lo hle thung. Beisei phak lo Charlie's Angels Chart hmasaa pakhatna, Pearl Harbour beih behchhana siam, Midway chu pahnihna niin, boruak nei lian tak Charlie's Angels chu pathumna a ni phak chuah thung.

Hollywood hmeichhe chhe lo rual Kristen Stewart, Naomi Scott, Ella Balinska leh Elizabeth Banks-te channa Charlie's Angels hi Zirtawpni liam ta khan US-ah tlangzarh a ni a, US Box Office-ah  $8,351,109 chiah a lalut thei.

A changtute aṭang ringawt pawh hian boruak nei lian a ni a, a hlawhtlin hle rin a nih laiin beisei erawh a pha lo hle a $mtd 10 pawh US-ah an lalut tling lo a ni. Khawvel puma a sum lakluh erawh $mtd 27.9 chuang a tling hman tho.

Top 10-ah film thar lang theu pathum a awm a, Ford v Ferrari leh Charlie's Angles bakah hian The Good Liar chu a lang bawk a ni. Chart hmasaa pathumna Playing With Fire chu palina niin, GOT star Emilia Clarke channa Last Christmas chu pangana a ni bawk.