Sawmtea Chhangte-in Krismas hla tichhuak dawn

Mizoram pum huap rimawi lama chawimawina sem chhuah ṭhin- Lelte Award, Vulmawi Award, Moonlight Award leh Ṭhazual Award la vek tawhtu Sawmtea Chhangte chuan Krismas hla ‘Hnam Zetin Tan Lal Lo Piang’ tih a tichhuak dawn.  

‘Hnam Zetin Tan Lal Lo Piang’ hi Rawngbawlliana (Tahan)-a mi phuah niin, tunhma chuan khawchhak lamah an lo tuipui viau tawh ṭhin a ni. "Pathianin damna leh hriselna min pek chhung chu zai hmanga amah fak leh chawimawi hi ka tum a ni a, Pathian zahngaihna kan chan avanga dam taka Krismas kan thleng ṭhin hi a lawmawm ka ti a, chumi pual chuan Krismas music video hi siam ve ngei ka duh ṭhin," tiin Sawmte chuan a hla thar chungchang a sawi.

Sawmtea hian krismas music video hi pali a tih chhuahna tur a ni tawh a, vawiin chhun dar 12  hian YouTube lama en theih turin a tlangzarh dawn a ni. ‘Hnam Zetin Tan Lal Lo Piang’ music video hi BS picture siam a ni a, recording hi Foster-ah tih niin music hi Rpa Ralte kutchhuak a ni thung.