Taylor Swift hnenah Award ngaihhlut pahnih hlan dawn
Los Angeles-a Hollywood Palladium hmuna December 12-a neih tur, 2019 Women in Music Event-ah, "Lover" singer Taylor Swift chuan "Billboard's Woman of the Decade Award" a dawng dawn.
He chawimawina hi kum 10 chhung Billboard chart hrang hranga a chet ṭhat vang a ni. Billboard 200 album chart-ah a album tihchhuah tawh panga chu pakhatna a nih pui thei a, Billboard Hot 100 chart-ah a single hla panga pakhatna a nihpui thei bawk. Worldwide stadium tour hlawhtling tak pathum a nei theih mai bakah 'Billboard Woman of the Year Award' vawi hnih a la tawh bawk a ni.
Thla leha neih tur American entertainment media brand Billboard buatsaih, 2019 Women in Music Event hi a vawi 14-na tur a ni a, Swift bakah hian Alanis Morissette chu 2019's Icon Award hlan a ni dawn a, Nicki Minaj pawh Game Changer award hlan a ni ang. Brandi Carlile pawh Trailblazer award hlan a ni dawn a, Desiree Perez hnenah Billboard's Executive of the Year chawimawina hlan a ni bawk ang.
Artist of the Decader Award a dawng dawn
November 24-a neih tur, 2019 American Music Award (AMA)-ah Swift hi "Artist of the Decade Award" hlan a ni dawn bawk. Kumina AMA sem turah hian Swift hian nomination panga a hmu a, King of pop Michael Jackson record siam khum thei turin a dinhmun a ṭha hle.
Swift hian AMA hi 23 a dawng tawh a, Michael Jackson khan 24 a la tawh thung. Pakhat a dawn belh leh a nih chuan King of Pop meuhin record a lo siam tawh chu a nihrual thei dawn a, pakhat aia tam a dawn phei chuan a khum thei tawh dawn a ni.