Chris Tomlin-a'n ‘Christmas Day: Christmas Songs of Worship’ EP tlangzarh

GMA Dove Awards ṭhahnem tak dawng tawhtu leh Grammy Award hial pawh dawng tawhtu Chris Tomlin chuan Christmas hla pali a dahna a EP ‘Christmas Day: Christmas Songs of Worship’ chu kar hmasa khan a tlangzarh.

A EP tlangzarh tharah hian We The Kingdom a thawhpuina 'Christmas Day' tih bakah a original hla dang pahnih- His Name Is Wonderful leh Hope of Israel-te a tel a, Krismas hla lar tak 'Little Drummer Boy' a tel bawk. Chris Tomlin-a hla tharte hi music streaming platform hrang hrangah ngaih­thlak theihin a awm tawh a, YouTube lamah pawh a lyric video-te pawh a dah­chhuak tawh bawk a ni.

"Kum khat chhunga ka hun nuam tih hunlai ber a ni," tiin Krismas boruak chu nuam a tih thu sawiin, kum danga a lo tih tawh ṭhin anga Christmas Tour nei tura an inbuatsaih dante chu nuam a ti hle tih a sawi bawk. "Chawlh hmang tura kan inpuahchah dante leh chhungkuaa in leh a vel kan cheite hi ka hlimpui hle a ni," a ti.

Tomlin hian December 2 aṭang hian Christmas Songs of Worship Tour a nei dawn a, North America hmun hrang hrang a fang dawn a ni. Hmun eng emaw zatah phei chuan ticket a hralh zo tawh hial a, December 20-ah New York-a The Beacon Theatre-ah a tour kharna hi a nei ang.

    1.    Christmas Day (feat. We The Kingdom)

    2.    His Name Is Wonderful

    3.    Little Drummer Boy

    4.    Hope Of Israel