Lifetime achievement award dawng tur Robert De Niro

SAG-AFTRA labor union chuan Oscar award pawh vawihnih lai lo dawng tawhtu, American-Italian actor Robert De Niro chu lifetime achievement award an pek tur thu a puang. 

Lifetime achievement award hi nakkum January 19-a Los Angeles-a neih tur SAG Awards ceremony-ah pek a ni ang. He chawimawina hi Elizabeth Taylor, Morgan Freeman leh Clint Eastwood-te pawhin an lo dawng tawh a ni. 

Kum 76 mi De Niro hian a film chan thiam vangin he chawimawina hi a dawng dawn a ni. "He union-ah hian kum 50 chuang member ka ni tawh a, SAG-AFTRA hnen aṭanga he award dawn hi chawimawina ropui tak a ni." tiin De Niro chuan a award dawn tur vanga a lawm thu a sawi. 

SAG-AFTRA lifetime achievement award hi union actor vote 1,60,000 tla aṭanga tlan a ni a, he award hi lemchan lama mithiam chungchuangte hnena pek ṭhin a ni.