THAZUAL AWARD 2020: Van Hlei Sung leh Rpa Ralte an langsar

Zonet Ṭhazual award chu Zirtawpni liam ta zanah khan sem zawh a ni ta a, Ningani khan Gospel singer-te hnenah award hi hlan niin Zirtawpni zanah khan Lengzem/Lenglawng singer-te hnenah award hlan a ni leh. Kumin chhunga lengzem hla lar ber zinga mi 'I ṭang ka belh lai khan ka hlim zawk si' tih chu Lengzem award sem zanah hian a lar zual hle a, a satu Van Hlei Sung chu Best New Artist Lengzem-ah thlan niin he hla phuahtu, zaithiam ni bawk Rpa Ralte chu Best Songwriter Lengzem-ah thlan a  ni bawk.

Rpa Ralte hla phuah 'I ṭang ka belh lai khan ka hlim zawk si' lyrics video hian YouTube-ah thlirtu maktaduai 2.5 chuang a nei a, a music video pawhin thlirtu maktaduai 1.4 chuang a nei bawk. Heta ṭang ringawt pawh hian a lar tih a hriat. Hle hla phuahtu Rpa Ralte-in Best Songwriter Lengzem award a dawng hi a mak lo a, a phu pawh a phu hle.

He hla satu New Zealand lama khawsa mek Van Hlei Sung chu Best New Artist Lengzem award dawngtu ni bawkin 'I ṭang ka belh lai khan ka hlim zawk si' hi kumin chhunga hla lar ber zinga mi chu a ni ngei e.

'I Hlutna' hmanga Zofate min awi tleitu Jaui chu Best Female Artist Lengzem award hum hawtu a ni. A hla rawn tihchhuah thar apiang a 'hit' ta zel emaw tih tur khawpa tunhnaia huhang ngah Jaui hi Zofate tan a hlu zual zel dawn niin a lang.

Hard Ray band singer Manuna pawh a tlana telh telh tih loh rual a ni lo, Zorimawi khawvel a rawn zuan luh aṭangin zaithiam huhang ngah ber zingah a tel chho char char a, kum 2020-ah pawh nominee ṭha tak tak karah Ṭhazual Best Male Artist Lengzem award a la dawng leh thei a ni.

Tunlai lengzem singer zinga lar ber pawl Jt Produc­tion leh Essy-te chu Best Group/Duo Lengzem-ah thlan an ni a. Michelle Varte chuan music video mit titlai tak Chawngtinleri hmangin Best Music Video a dawng bawk.

Best Mizo Traditional Artist award chu Laithang­puii'n a hum haw ve bawk a ni.  

Ṭhazual award ceremony hlutna ber pakhat chu performer-te kha an ni ti ila kan tisual awm lo e. Tunlaia rock band kan neih ṭhat ber zinga mi Mood Station-in thothang ṭha takin show an hawng a, Zaii Hauchhum leh Grace 10.45-te talent neih ṭhat zia kha hmuh hmaih thiang a ni lo, Jojo-i'n stage a luah hneh a, a zai thiam piah lamah a hmuhnawm.

Feli Fanai mawlh mai kha, sawi hmaih chi a ni lo. Thlirtute a hla lungkuai tak hmangin min awi hneh hle.  Awmtea Polymer-in 'Thlasik rim' a rawn namtir fuh hle bawk. Keimah Senes x Tlangval Tlumtea te pawhin an hla hit ngei mai an rawn thlawh chhuak bawk. TV lama thlirtute pawhin hripui leng lo se chu a hmuna kala lo lampui suau suau an chak ngei ang.

Sangkimi Khiangte chuan Mizo rilrem zawng tak hla nen, Mizo lam hmuhnawm tak entir tel chungin thlirtute min awi tlei bawk a, show hlawhtling tak a ni.