Hip Hop Fest 2019 December thlaah nei dawn

December 16 hian Dawrpui Multipupose Centre-ah Hip Hop Fest 2019 buatsaih a ni dawn. Hip Hop music lama tui mite tan thu lawmawm tak a ni ngei ang.

Hip Hop Fest 2019-ah hian Mizorama a vawi khatna atan event khata Hip Hop Element chikim phochhuah tum a ni a, ram puma event ngaihlut tak a nih theihna turin a buatsaihtu lam pawhin lawmman leh judge lam pawh an uluk hle a ni.

"India ram hmun hrang hranga Hip Hop tuite kan ram ngeiah hip khawm ve kan duh a ni. Miten Hip Hop nihna dik tak hria se, a culture hrang hrang- Bboying, DJ-ing. MCing leh Graffity-te lo hmelhriat se. Kan Mizo ṭhalaiten helamah hian talent an neih ṭhat zia miin lo hre ve se tih hi kan thupui ber a ni," tiin a buatsaihtu zinga mi Dr. Reuben-a chuan Vanglaini a hrilh.

He hunah hian Rap Concert pui tak neih a ni dawn bawk a, Old School leh New School rapper-te pawh kan hmu dawn a, G'Nie, Murphy leh Rinhlui Pialtu-te pawh an perform dawn. Rd-i AKA Ladilicious comeback kan hmu dawn a, Dr. Reuben-a pawh a rawn ding chhuak dawn bawk.

Ni khatah hian zawhfel mai an tum lo, December 16-a Hip Hop Fest neih tukah hian 'GOT Soul' event buatsaih chhunzawm an tum a, heipawh hi Hip Hop Event tho a ni. Hip Hop Fest hi Mizorama Hip Hop lama sulsutu leh Hip Hop Jam-te pawh lo huaihawt tawhtu Team Zero 1-te chuan an buatsaih dawn a, helama tui mite tan chuan hmaih phal chi a ni lo ang.