2019 Victoria's Secret Fashion Show nei dawn lo
Victoria's Secret parent company, L Brands chuan 2019 Victoria's Secret Fashion Show neih tur chu ṭhulh a nih thu a puang chiang ta.
L Brands chief financial officer leh executive vice president Stuart B. Burgdoerfer chuan Ningani khan show neih tur hi ṭhulh a nih thu a puang. Victoria's Secret Fashion Show hi kum 1995 aṭang khan buatsaih ṭan niin, supermodel lar tak tak an inlan ṭhin. Model ho pawhin he show hi an dah sangin, inlan pha nih pawh an chak thei hle a ni. Kum 2001 aṭang khan show hi TV-ah pekchhuak niin ABC-in a pe a, kum 2002-2017 chhung khan CBS-in a tichhuak ve thung. Mahse nikum khan ABC bawkin a pe leh a ni. Kum 2016 aṭang khan show thlirtu hi an tlahniam ve zel a, nikum kha show an neih tawha rating a hniam ber ṭum a ni.
May thla khan L Brands CEO Les Wexler chuan annual runway show an buatsaih ṭhin, television-ah tihchhuah hi a fuh tawh lo niin a lo sawi tawh. Fashion business chu a inthlak danglam ve reng a, hei vang hian anni pawhin hma sawn zel turin kalphung thlak a ngai tawh niin a sawi.
July thla tawpah khan model Shanina Shaik chuan kuminah Victoria's Secret Fashion Show hi a awm dawn loh thu The Daily Telegraph-in a kawmnaah a lo sawi lang tawh a, pawi a tih thu a sawi tawh bawk. Kumdangah chuan July thla tawpah chuan show nei turin training an neih ṭhin thute pawh a sawi a, mahse khatih lai khan Victoria's Secret lam hian thuchhuah engmah an siam lo a, tunah erawh an tichiang ta a ni.