DC Titans Season 3-ah hmel thar

DC comics Teen Titans behchhana TV Series an siam Titans season 3-ah mi thar inlan tur an awm dawn a, chu chu tudang ni loin dan hnuaia Gotham khawpui venghim ṭhintu Jim Gordon fanu Barbara Gordon a ni.

Hemi chungchang hi Thawh-lehni zingah khan Variety chuan tarlangin Batgirl kan hmu dawn a nih hmel a, Titan en ṭhin tan chuan chanchin phurawm tak tur a ni ngei ang. Barbara lemah hian Savannah Welch a chang dawn tih tarlang telin Titans khawvelah hian a bat suit a lo dahṭha fel tawh dawn niawm tak a ni a, Gotham police commissioner a lo ni tawh dawn a nih hmel.

Batgirl hi a chanchinah chuan Batman-a hmelma lian ber Joker-in a kah avangin a zeng zui a, wheelchair-ah a hun a hmang chhunzawm a ni. Hemi behchhan hian Titans-ah pawh hian a inlan dawn a, a wheelchair aṭangin hna a thawk dawn niawm tak a ni. Oracle hming a puttir tel dawn em tih tarlan a ni lo a, tunhmaa inkungkaihna thuk tak a lo neihpui tawh leh misual a lo beihpui fo ṭhin, Dick Grayson (Brenton Thwaites) an khuaa a lo kir leh avanga a hun hman dan danglam chhoh dan vel kan hmu dawn a ni mahna.

Titans en ṭhin chuan season 2-ah khan Deathstroke vanga an buaina an chingfel tih an hre ṭheuhin a rinawm a, chutih rual erawh chuan  Jason Todd chu an member aṭangin a inhnukdawk a, season 3-ah hi chuan DC Comics line angin Red Hood a rawn nih tawh a rinawm.

Titans season 3-ah hian  Brenton Thwaites, Anna Diop, Teagan Croft, Ryan Potter, Curran Walters, Conor Leslie, Chelsea Zhang, Joshua Orpin, Minka Kelly, leh Alan Ritchson-te an inlan dawn tih puanzar a lo ni tawh a, kumin June-ah hi chuan production an zawh hman beisei niin HBO Max lamah an pek chhuah thuai theih rin a ni.

Season 2 tawpah khan Donna Troy / Wonder Girl lema chang Conor Leslie khan midang himna turin a nun a hlan a nih kha, season 3 cast list-ah a hming a lang leh a, Themyscira lamah lo thawi nun leh dan an hria pawh a ni mai thei. Titans leh DC fan-te chuan season 3-ah an hrechiang ang chu.