Feli Fanai 'Lengdang ṭang a bel' a vul

Hontrade International Ṭhazual Lengzem-ah Feli Fanai tluk zo an awm lo a, a hla thar ber 'Lengdang ṭang a bel' chu pakhatna nihpuiin, Ticos Dara 'Lunghlu' chu pahnihna niin, Sangkimi Khiangte 'Tuar thiam a har ngei e' chu pathumna a ni bawk.

Chart hmasaah palina a ni a, tunah erawh a hmaa mite rawn zuankhumin pakhatnaah a inhlangkai der mai. Feli Fanai hla thar ber 'Lengdang ṭang a bel' chuan thlan hlawh berin Ṭhazual chart-ah tluk zo an awm lo a ni. He hla lungkuai tak mai hi October thla tira a tihchhuah kha niin, YouTube lamah pawh thlir a hlawh hle a, mi nuai riat chuangin thla khat chhung velin an thlir tawh a ni.

'Lengdang ṭang a bel' hi PL Rinsanga leh John Hnamte-te phuah a ni a, music mawi tak mai hi Kima Chhangte kut­chhuak a ni. Video hmuhnawm tak mai hi BS Pictures kut­chhuak niin, designer Escape Engmawia'n hmuhnawm tak turin a direct a, a hla a nalh bakah a video hian mit a titlai hle. Ṭhazual award-ah pawh Best Music Video Lengzem la thei a ni a, a hla a nalh piah lamah a satuin a sa thiam bawka  dinhmun sang berah a rawn invawrh hi a mak lo hle a ni.

Mizo Idol star Ticos Dara hla thar 'Lunghlu' chu dinhmun ngaiah dingin, pahnihna a ni leh. Chart hmasaah khan pahnihna a ni tawh a, Ṭhazual award-a Best New Artist Lengzem dawngtu hian 'Lunghlu' hi dinhmun ṭha berah a rawn dinpui a nih pawhin a mak lo ang.

Pathumnaah pawh hian chart hmasaa pathumna Sangkimi Khiangte 'Tuar thiam a har ngei' bawk a awm leh a , Sangkimi leh Ticos-te hian an dinhmun ngai an la humhim zel a ni. Chart hmasaa pakhatna Essy 'Kan hawi kir lo'ng' chu palinaah awm thungin, Jaui 'Ka hawisan tawh che' chu pangana a ni ve leh bawk a, ani pawh hian a dinhmun ngai a luah leh bawk.

Tunṭum Ṭhazual chart-ah hian hla thar pali lai a lang. Van Hlei Sung chuan a hla thar 'I ṭang ka belh lai khan ka hlim zawk si' chu parukna a rawn nihpui nghal a, Manuna pawhin a hla thar 'Ka hmangaih vang' chu pariatna nihpuiin Dj Lalvenhimi leh Aziri-te pawhin chart-ah an hla thar an rawn lanpui ve bawk a ni.