'Khep Khep Maia'

Josephine Lalawmpuii music video hit tak mai 'Khep Khep Maia' chu YouTube revenue lamah buaina a tawh hnuah chinfel a ni ta.

He music video hi June thla khan MDM YouTube channel-ah dah a ni a, thlir a hlawhin entu an pung chak hle a,rei loteah million view nei chho thuaiin, YouTube aṭang hian revenue pawh a la nei nual hman. Hetia a hit chhoh mek lai hian misual tu tih hriat lohten a hla copyright hi lo claim-in anmahni account a pawisa lut vek turin an lo siam a ni. A hla satu Josephine-i pawh hian hian ṭum khat chiah re­venue a lalut hman a, a bak zawng hi chu a lo khawih chingpentute hian he video aṭanga sum lut zawng zawng chu an lo la hman vek thung.

Hei hi MDM Media cell-te chuan an hriat rualin hma an la nghal a, theihtawp chhuaha an bawhzui aṭanga thla thum zet a liam hnuah copyright hi la let lehin tunah chuan Josephine-i hian a hlawkna a tel leh thei tawh dawn a ni.

MDM chuan an zai­thiamte tana MDM YouTube channel-a an dah tawh hetianga misualin an lo khawih hi ṭha lo an tih thu Vanglaini hrilhin, Mizo zaithiamte thawhchhuah hi anmahni ngeiin an tel theihna turin hma an la zel dawn tih an sawi.

Tunah hian hma thar lain, zai­thiamte zai Audio (Mp3)-te chu internet streaming platform hrang hranga stream-a subscribe theih turin hma an la mek bawk a, hengte hi lo khawih buai sak tawh lo turin MDM chuan mipuite an ngen bawk a ni.