Rahbi OST an tlangzarh ta

Kristian Ṭhalai Pawl (KṬP), Mission Veng Branch chuan Kristian movie an siam mek a, kuminah ngei tlangzarh hman an tum. Chu an movie behchhan chuan music video an siam bawk a, music video chu nizan khan an Branch KṬP inkhawmah Pathian hnenah hlànin, an tlangzarh.

KṬP branch lian ber Mission Veng Branch KṬP hian an film siam mek hi nikum 2018 aṭang khan buaipui ṭan tawhin, kuminah an buaipui chhunzawm zel a, an peih thawkhat thuak tawh. He Kristian movie hi a hming tur chu 'RAHBI' tih a ni a, a buaipuitute pawh Mizorama film siam lama sûlhnu nei ṭha tak takte an nih avang­in, mit leh beng duh zawng inang lo tak tak karah hian a hmuhnawm hle turah ngai ila, a sual tampui lo ang.

'Rahbi' Kristian movie behchhan hian music video an siam nghal bawk a, 'Rahbi' original sound track (OST)hi tuna Mission Veng Branch KṬP secretary ni mek Lalbiakdika phuah niin, an member Lalawmpuii'n mawi takin a sa a. Music chuThangbawiha kut­chhuak a ni thung. He music video hi nizan khan an Branch KṬP inkhawm­ah Pathian hnenah hlanin an tlangzarh ta a ni.

Rahbi OST hi Mission Veng KṬP official YouTube channel 'KTP Mission Veng'-ah a duh apiang en turin dah a ni a, lo thlirsak a, ngaithla ṭheuh turin Mizo mipui an ngen a ni. YouTube bakah hian, Aizawla cable TV pa­hnih - LPS Vision leh ZONET-ah dah a ni dawn a, Mizoram Synod channel 'Hruai­na Êng' ah dah a ni bawk ang.