Sonic a tlan chak fal

Hun eng emaw chen Box Office-ah thil danglam em em a thlen loh hnuah kar tawp liam taah khan film thar ṭha tak tak a chhuak nual a, chart dang aiin film hrang hrang sum lakluh dan pawh a nghing nasa.

Sonic the Hedgehog chu sum lalut tam ber a ni a, chart hmasaa pakhatna Birds of Prey: And the Fantabulous Emancipation of One Harley Quinn chu pahnihnaah la awmin Fantasy Island chu pathumna a ni ve bawk.

Tun hma deuha SEGA khel ṭhin chuan Sonic the Hedgehog hming hi chu an hre hlein a rinawm. SEGA video game behchhana film siam fantasy adventure film Sonic the Hedgehog chu Valentine's Day-ah khan US-ah tlangzarh a ni a, a che ṭha nghal hle.

Jim Carrey leh James Marsden channa Sonic the Hedgehog hian lawm a hlawh a, theatre 4,167 aṭangin $58,000,000 zet a lalut a ni.

He video game adaptation film hi trailer aṭang ringawt kha chuan naupang en duh tur chi tak niin lang mah se khawthlang lam khu chuan naupang film hi an ngaihlu ṭhin tih a hriat. Chutihrual chuan opening weekend-a a entu tam ber hi kum 25 hnuai lam an ni thung. Khawvel puma a sum lakluh tawh zat pawh $mtd 113 zet a ni tawh.

Margot Robbie channa Birds of Prey: And the Fantabulous Emancipation of One Harley Quinn chuan $17,285,000 a lalut a, Sonic a ngam ta lo a ni. Joker-a bialnu hian ngam loh tawng ta mah se boruak nei lian ber zinga mi a la ni tho.

Lucy Hale channa American supernatural horror film Fantasy Island pawh a che ṭha a, film ṭha tak tak karah pathumna a ni phak. Fantasy Island hi kumin chhunga film chhuak tawh zinga en tlak ber pawl tura ngaih a ni.

Romantic drama film The Photograph pawh a che ṭha hle a, sum lalut tam palina niin Fantasy Island nen an sum lakluh a inthlau lo hle.

Top 10-a film thar lang zingah Downhill a tel bawk. Comedy film a ni a, Swedish film kum 2014-a tihchhuah Force Majeure remake a ni thung.

Chart hmasaah khan chuan 11-naah awm phak ṭawk mah se Oscar-a a chet ṭhat a hlawkpui zel a, sum lalut tam pasarihnaah a rawn invawrh leh. Parasite ticket hralhna hi a invawrh nasa hle a,  234% zetin a pung a ni.

Sonic the Hedgehog tlangzarh a nih hma kha chuan video game adaptation movie, opening weekend-a sum lalut tam ber chu nikum May thlaa tlangzarh Pokémon: Detective Pikachu kha  a ni a, mahse Sonic hian Pokémon record hi a rawn khum ta a ni. Detective Pikachu ai khan $mtd 3 dawnin sum a hailut hnem.