'Zalenna' a hmuhnawm dawn

Mizoram buai hunlai beh­chhana siam, 'Zalenna' film chu nakkum January hian tlangzarh a ni dawn.

He film hi One Vision Media Ministry-te'n feature film an siam hmasak ber tur a ni a, ṭhalai leh naupangte tan pawha en him, Pathian thu leh nundan ṭha inzirtirna film ṭha tak a ni dawn a, Kohhran ṭhalai pawl leh YMA anga inhlawhna atana chhuah duh tan pawh ngaihven chi a ni ngei ang.

Nunna Thar film siamtute khan ministry dinin, One Vision Media Ministry an inti a, anni hian Mizote tan, a bik takin ṭhalai naupang zawkte Pathian thu zirtirna keng tel, feature film te leh film ṭha dang siam tumin hma an la mek reng a ni. 

Saitual ramah thla khat vel zet riahchilhin shooting an nei a, Aizawl lamah scene eng emaw zat shoot bawkin, an puitlin ṭep tawh a, kumthar lamah chuan kan en thei tawh dawn a ni.

Eng lam nge a nih dawn? 

Mizoram buai hunlai beh­chhana siam mah ni se, a thawn­thu erawh chulam hawi vek chu a ni dawn chiah lem lo. "Mahni buaina zawn zawnah kan buai tawh a, harsatna leh nun ipiknate neiin, nu valai leh pa valai te leh ṭhlalai naupang zawkah anxiety disorder/depression hial nei kan tam ta lutuk te hian kan rilru lam a zalen loh zia a tilang chiang hlein ka hria. Heng kan nuna harsatna lo thleng lak aṭang hian zalenna kan zawng a, ṭhenkhat chuan ruihhloah te, sex lamah te leh khawvel sum leh pai neih hnem lamahte kan intlansiak nasa em em tawh a. Mahse Zalenna tak tak leh, chatuan daih zalenna chu 'Isua Thisen' chauh kha a ni tih hi he thawnthu hmang hian tihlan a ni a, he Film ‘Zalenna’ tih pawh hian chu chu a kawh lian ber a ni," tiin he film script writer leh director ni bawk Siama (SVP) chuan Vanglaini a hrilh.

A changtute lam

Nunna Thar-a a changtupa, zaithiam Andrew Laltlankima kan hmu dawn a, Sangtei Renza leh Adama-te pawh an inlan dawn. Stacy's Penitence vocalist Jeremy Ralte kan hmu dawn bawk.Chumai a la ni lo, Scooty film lama kan hmuh tawh Zorina leh Papuia Pachuau-te an inlan dawn a, Where a changthiam tak mai Elivis-a pawh kan hmu dawn a ni.

OST hi Andrew Laltlankima sak a ni a, karleh lamah hian tihchhuah hman an tum. Zaithiam leh hlaphuah thiam K.Hminga'n sound track siamin, Toi Intoate (Kings & Prophets studio) lamin recording hi an ti thung. Zalenna soundtrack-ah hian K. Hming­a hla te, Magdalene vocalist Ste­ward Lalrochama hla te leh hlaphuah thiam fam ta R. Lalremruata (Parema) hlate pawh hman a ni bawk.