Ropuina ramah Frozen II

Kar tawp liam ta Box Office-ah khan Frozen II chu sum lalut tam ber a ni a, Ford v Ferrari chuan dawtin A Beautiful Day in the Neighborhood chu sum lalut tam pathumna a ni ve bawk.

Kum 2013 khan Walt Disney Animation Studios chuan Frozen a tichhuak a, naupang leh ṭhalai lawm a hlawh zia leh hmuhnawm titu an tam zia chu film lam tuipuitute chuan an hre ṭheuh awm e. Hans Christian Andersen-a fairy tale "The Snow Queen" aṭangin he film siam tur hian 'idea' an nei a, Disney Animation film zinga hlawhtling ber pawl a ni ta a ni.

Zirtawpni liam ta khan he film chhunzawmna Frozen II chu US-ah tlangzarh a ni a, a hlawhtling nghal rem rem hle. November 7-a Dolby Theatre-a premier a nih aṭang khan boruak a nei lian tawh a, tlangzarh a nih kara a sum thawhchhuah chu $130,263,358 zet a ni. 

Khawvela film siam tawh zingah tlangzarh aṭanga ni hnih chhung vela $mtd 130 lalut tling thei hi an tam lo hle a, hei hian Frozen II ropuizia a tilang. Mizo nu leh pate'n naupang film tia an sawi ṭhin hi khawthlang lamah chuan lawm a hlawh viau zel a, khawvel puma a sum lakluh tawh chu $371,274,305 lai a ni tawh a, kumin chhunga film tihchhuah zinga sum lalut tam berte zinga mi a ni der tawh.

Kar tawp liam taah khan theatre 4,440-ah tihchhuah a ni a, he 3D computer-animated musical fantasy film hi a hlawhtling hle a ni. A film hmasa aṭanga kum 3 liam hnua Elsa leh Anna-te chanchin tarlan a ni a, Elsa-i'n magic a neih chhan vel an zawnna lam a ni ber a,  'highest opening for an animated film of all time record' a siam hial hian a hmuhnawm zia a tichiang.

Pahnihnaah hian chart hmasaa pakhatna Ford v Ferrari a la inham tang a, $15,730,678 lalutin Frozen II nena an sum lakluh zat hi a inthlau rem rem hle. Frozen II-in US-a a sum lakluh ringawt pawh hian Ford v Ferrari-in khawvel puma a sum lakluh tawh zat chu a la khum chiang hle a ni.

Sum lalut tam pathumna leh palina hi film thar an ni a, A Beautiful Day in the Neighborhood chu pathumna niin, 21 Bridges chu palina a ni ve bawk. A Beautiful Day in the Neighborhood hi Tom Hanks channa a ni a, Tom Junod lehkhabu ziah "Can You Say... Hero?" behchhana siam a ni.

21 Bridges hi American action thriller film niin, Black Panther-a changtupa ber Chadwick Boseman channa a ni thung a, hei pawh hi film boruak nei lian tak a ni. Box Office-a pakhatna pawh lo ni tawh, chart hmasaa pahnihna Midway chu pangana a ni ve bawk.

1.    Frozen II    $mtd 130

2.    Ford v Ferrari    $mtd 15

3.    A Beautiful Day in    $mtd 13

    the Neighborhood

4.    21 Bridges    $mtd 9

5.    Midway    $mtd 4.6

6.    Playing with Fire    $mtd 4.5

7.    The Good Liar    $mtd 3.4

8    Charlie's Angels    $mtd 3.4

9    Last Christmas    $mtd 3

10    Joker    $mtd 2.7