Harry Styles leh Shania Twain-te'n Zai dun an tum!

Kum lamah chuan inthlau viau mah se an tuina a inan miau avangin, Harry Styles leh country singer Shania Twain-te chuan an zai dun dawn tih an sawi.

"Harry nen hian kan inngaina tawn em em a, a fan ka nia, ani pawh ka fan a ni. Hla ṭha tak kan ngaituah chhuakin studio-a record kan tih theih thuai ka beisei a ni," tiin Shania Twain chuan Harry nena an la zai dun tur thu Access Daily TV program-in an kawmnaah a sawi.

Kar kal ta Ningani khan BBC Two tih­chhuah, Later with Jools Holland program-ah Harry hi a zai a, khatah khan Shania Twain fan a nih thu leh a music a ngainat thu a lo sawilang ve tawh bawk a ni.

Nikum June 22 khan Harry leh Shania-te hian New York-a milarte fuankhawmna hmun, 'Madison Square Garden'-ah Shania hla lar tak mai, 'You're Still the One' chu an lo sa dun tawh a ni. Tuna zaidun an tum leh pawh hi thil mak a ni hran lo a, Harry pawh hian country lam a ngaina ve tho a, chuvang chuan an combination hi a fuh chhoh viau mai thei.