Hontrade International Ṭhazual Lengzem-ah Jonathan Lalengzauva tluk thei awm lo

Hontrade International Ṭhazual Lengzem  chart-ah roreltu thar an awm a, chu chu tudang ni loin Mizo Idol star Jonathan Lalengzauva a ni. Jonathan hian a hla thar 'I tan ka hmangaihna' chu Ṭhazual chart-ah pakhatna a nihpui a, DJ Lalvenhimi chuan a hla thar 'Khuarei an' chu pahnihna nihpui ve bawkin Fela Colney 'Tunlai Nula' chu pathumna a ni thung.

Mizo Idol 2018-a leikapui style hmanga Mizote min awi ṭhintu, Jonathan Lalengzauva hla thar 'I tan ka hmangaihna' hi Lallianmawia Pachuau phuah a ni a, Jonathan-a hian a sa thiam hle a ni. He hla hi Jonathan-a sak tura phuah reng emaw tih tur khawpa mawiin Jonathan-a hian a sa thiam a, lung tileng nghal vawng vawng thei niin, chart-a dinhmun ṭha ber a hauh pawh hi a mak lo. Mizo tam zawkten kan ngaihthlak duh tur chi tak, hla lungrun tak mai a ni a, ngaihthlak a manhla hle.

Music Video a simple a, khuareiah pawh hmuh a nuam reng ang tih a rinawm. Video hi  Francister GFX kutchhuak a ni a, music hi EME Records siam niin Hmachhuana Khiangte (Hope Music) hnenah recording hi tih a ni thung.

DJ Lalvenhimi tunge a nih sawi tam a ngai lo. A hla thar ber  'Khuarei an' tih pawh hi a tihchhuahna a la rei lo viau nachungin chart-ah pahnihna a rawn nihpui thei tawh a, mipuiin DJ-i an duh tih a hriat. Hla a tihchhuah hnu rei loteah chart-ah rawn lang nghalin, chart hmasaah khan pangana a ni a, tunah erawh dinhmun sang ber dawttu a rawn luah thei tawh a ni.

Chart hnuhnung bera pakhatna dinhmun luahtu Fela Colney 'Tunlai Nula' chu pa­thumnaah a awm ve thung a, DJ-i leh Jonathan-ate a ngam ta lo thung. Palinaah hian HT Lalthanzami  'Di rialin' chu awmin Lawmi Khiangte chuan a hla thar, MPL kick off zana a tlangzarh 'Love at first sight' hmangin pangana a rawn hauh ve leh bawk. 

Tunṭum chart-ah hian hla thar a awm nual a, a chunga kan tarlan tawh Lawmi Khiangte hian 'Love at first sight' hi pangana a rawn nihpui nghal thei a, a namai lo hle. Ani bakah hian Mizo Idol star tho Ticos Dara 'Lunghlu', Essy 'Kan hawi kir lo'ng', Jaui 'Ka hawisan tawh che' tih leh Marina V Varte 'Turnipui'-te chu chart-a hla thar rawn langte an ni. 

Tun ṭum chart-ah hian Top 5 chin hnuailam zawng hi chu hla thar vek a ni a, hla thar ṭha tak tak ngaihthlak tur a tam tih a hriat a, a phurawm hle a ni. 

1    Jonathan Lalengzauva    I tan ka hmangaihna 

2    Dj Lalvenhimi    Khuarei an 

3    Fela Colney    Tunlai Nula

4    HT Lalthanzami    Di rialin

5    Lawmi Khiangte    Love at first sight

6    KR Robert    Hello

7    Ticos Dara    Lunghlu

8    Essy    Kan hawi kir lo'ng

9    Jaui    Ka hawisan tawh che

10    Marina V Varte    Turnipui