Forever 21-in court-ah humhimna dil

Fashion retailer Forever 21 chuan kar kal ta Pathianni khan an sumdawnna tlachhe zel tur vennan "Chapter 11 bankruptcy protection" hmangin court humhimna an dil.

Mipuite'n online kaltlanga thil an lei nasat tawh avangin, Forever 21 hian tunhma angin dawrtu an hmu tam tawh lo a, an company hi a tlachhe mek a ni. Forever 21 neitu Do Won leh Jin Sook-te chuan Asia leh Europe rama an dawr tam tak chu khar a ngaih thu an sawi a, heng bakah hian US-a dawr 178 khar a ngaih thu an sawi bawk. Chutih rualin Mexico leh Latin America-ahte chuan a ngai angin kalpui zel a nih tur thu an sawi.

Forever 21 executive vice president Linda Chang chuan court venhimna an dil hi nakin zela an company tluchhe tur venna tur a nih thu leh an tih ngei ngei tur a nih thu a sawi a ni. American fast fashion retailer Forever 21 hi tunah hian ram 57-ah inzar pharhin, dawr 800 chuang an nei a ni. An headquarters chu Los Angeles, California-ah a awm a. April 16, 1984 khan din a ni bawk. 

Mizo-te pawhin thawmhnaw company kan hriat lar tak, Forever 21 hian hmun hrang hranga an retailer-te chuan dawrtu an neih tlem thu leh leh dawr luah man a san thu an sawi hnuah, khawvel hmun hrang hranga an dawrte hi khar ṭhen an rawt ta a ni.