TBC-ate pafain hla thar tichhuak dawn

TBC Zaithanpuia pa, 'Heiha Huiha' tih hla hmanga Zoram lo dengchhuak tawhtu  TBC Lalram­kima chuan kum tam tak liam hnuah hla thar 'Hnutiang Hawilo' a tichhuak dawn.

'Hnutiang Hawilo'-ah hian TBC Zaithanpuia hian a pa hi a pui nghe nghe a, music video-ah pawh an inlan duh dawn a ni. He hla hi an pafaa hla an record dun leh music video an siamdun hmasak ber a ni a, an tan pawh a hlu hle ang.

'Hnutiang Hawilo' hi July 10-a chatuan ram pan ta Lalawm­puia (Puipuia) puala TBC Lalramkima phuah a ni a, October 3 hian Puipuia piancham pualin an tlangzarh dawn a ni. Video hi BKS Visual production kutchhuak niin, recording hi Gosen recording-ah tih a ni thung a, TBC Zaithanpuia YouTube official channel-ah dah a ni ang.