Abominable A chungnung ber

Box Office-ah computer-animated adventure film Abominable-in ro a rel a, chart hmasaa pakhatna Downton Abbey chu pahnihna niin Hust­lers chu pathumna a ni bawk.

Khawthlang lama chengte khuan helama naupang en duh tur niawm taka kan ngaih hi an tuipui viau zel mai. Abominable pawh hi  com­puter-animated film niin, How to Train Your Dragon lo hlawhtlinpui tawhtu DreamWorks Animation leh Pearl Studio-te produce a ni a, Jill Culton direct a ni thung.

September 27, Zirtawpni khan US-ah tlangzarh a ni a, heti chung hian US Box Office roreltu a ni hman, hei hian a hmuhnawm tih a lantir chiang awm e. Tleirawl pakhat 'Yi' chuan 'Yeti' pakhat Shanghai-a a apartment building chungah a tawng a, a ṭhiante pahnih nen a hming 'Everest' tia phuahsakin, a chhungte an zawnpui dan chanchin a ni. A chhungte an zawnpuinaah hian 'Everest' chu man tum an lo awm ve leh bawk nen, harsa tak kara a chhungte an zawnpui dan chanchin a ni a, a hmuhnawm ang tih a chiang.

Abominable film hi a rei lo hle a, minute 97 chiah niin September 7 khan  Toronto International Film Festival-ah premier a ni tawh a, heta entute pawh hian an fak hle a nih kha. UK lamah chuan October 11-ah tlangzarh a ni chauh thung ang. Kar tawpah khan theatre 4,242-ah chhuah niin, $20,­612,100 a lalut hman a ni.    

Chart hmasa lama pa­khatna dinhmun beisei loh deuha rawn luahtu Downton Abbey chu sum lalut tam ber dawttu a ni a, $14,340,035 zet a la lalut phak. Chart hmasaah pangana ni mah se Hustlers chu pathumnaah a rawn invawrh leh a, he American crime comedy drama film hi kar thum liam taa tlangzarh ni tawh mah se sum lakluh tam lamah erawh a la theuneu lo hle.

It: Chapter Two chu a dinhmun ngaiah la dingin sum lalut tam palina bawk a ni leh a, panganaah hian chart hmasaa pahnihna Sci-Fi movie Ad Ashtra chu a awm ve bawk. Rambo: :Last Blood chuan beisei a la pha lo zel a, paruknaah a la inham tang ve ṭawk a ni. 

Box Office top 10-ah hian film tlangzarh thar hi Abominable bakah hian pasa­rihnaah Judy tih chu a awm bawk a, top 100-ah film tlangzarh thar langphak 13 a awm.

1    Abominable    $mtd 20

2    Downton Abbey    $mtd 14

3    Hustlers    $mtd 11

4    It: Chapter Two    $mtd 10.2

5    Ad Ashtra    $mtd 10

6    Rambo: Last Blood    $mtd 8

7    Judy    $mtd 2.9

8    Good Boys    $mtd 2

9     The Lion King (2019)    $mtd 1.6

10    Angel has Fallen    $mtd 1.5