Brown Eyed Girls an lo kir leh dawn

Kum 2000 chho vela K-Pop fan lo ni tawhte chuan kan hriat ngei a rinawm, K-Pop hmeichhe band Brown Eyed Girls-te hi an lo kir leh dawn niin South Korean live video streaming 'V Live'-ah Miryo, Ga-In, Narsha leh JeA-te chuan an sawi. 

Brown Eyed Girls band-te hian kum 2016 khan band anga chet hona chu an chawlhsan rih a, mahse tunhnaia an lo kir leh dawn thu an sawi hian an fan tam takte chu a tilawm ngei ang. 'V Live'-ah hian an band member zinga mi, Miryo chuan fan-te hmaah kan ngai lutuk che u, a rawn ti a. Ga-In chuan kumin October-ah hian kan album thar nen kan lo let leh dawn a ni, a ti bawk. JeA pawhin kan fan-te chuan min nghakhlel hle tawh a ni, kan theihtawpa ṭhain kan rawn inbuatsaih bawk dawn a ni, tiin 'V Live'-ah hian an fan-te hmaah a sawi.

Kum 2015 khan an album hnuhnung ber an tichhuak a, hemi hnu hian solo angin an kal hrang zui a ni. An hla lar ber tia chhal ngam kum 2009-a an tih­chhuah "Abracadabra" chu Korean Music Awards 2010 khan Best Dance/Electronic song of the year an lo lakpui hial tawh a ni. Brown Eyed Girls hi kum 2006 khan an indin a, award ngaihhlut 12 lai an lo la tawh bawk. 

Kum 2008-a an tihchhuah "L.O.V.E" tih hla hmangin mite hriat an hlawh hnuah, "How Come" tih hla hmangin K-Pop zinga hmeichhe band lar berte zingah an rawn invawrh leh a ni.