'Jerusalem'-in duhtu a ngah ber Pathumnaah 'In Christ Alone'

United Kingdom mipuite Hymn duh ber thlanna BBC Songs of Praise special-in vote hmanga a buatsaihnaah 'Jerusalem' chuan vote a hmu tam ber a, UK Favorite Hymn-ah thlan a ni. Hetihlai hian Mizo Kristiante pawhin kan hriat tak mai 'How Great Thou Art' (Aw Lal Pathian) chu vote hmu tam ber dawttu niin, pathumnaah hian hla hlui em em ni hran lo 'In Christ Alone' chu a lang ve bawk.

Vote thlaktu pawh hi an tam hle a, vote a tla ṭha hle nia tarlan niin, UK mipuite hian Hymn hi an la hlut hle niin a lang.

UK mipuite tana hla ropui 'Jerusalem' 

UK mipuiten an duh ber 'Jerusalem' hi William Blake-a poem, kum 1804 ve daih tawha a ziah, kum 1916-a Hubert Parry-a'n a music a siam a ni a, a original poem hming chu ‘And did those feet in ancient time' tih a ni.

He poem hi  'apocryphal story', naupang Isua chu Josepha (a thih hnua phumtu) nen England-a an zina  Glastonbury an tlawh chanchin behchhana phuah a ni a, Thupuan 3:12 leh 21:2 nena inzawm, Isua lo kal leh hun tur nen pawha inzawm poem a ni. Hubert Parry-a'n a music a siam hnu hian a lar zual hle a, Saint George's Day-ah English Cathedral, biak-in leh chapel-ahte sak a ni ṭhin.

Westminster Abbey-a Prince William leh Catherine Middleton-te inneihnaah pawh khan sak niin, school tam takah pawh an la sa nasa hle.  London Olympics 2012-ah pawh khan opening hymn atana hman a ni a, England Unofficial National Anthem tite pawhin an sawi ṭhin.

'How Great Thou Art' 

Mizo Kristiante pawhin nasa taka kan sak ṭhin, 'How Great Thou Art' chu UK mipuiten an Hymn duh ber dawttu a ni. He hla hi Deuteronomy 33:26 behchhana siam niin,  Carl Boberg-a'n 1885-a Swedish ṭawnga a poem ziah a, a hnua German-a lehlin, Russian-a lehlin a nih leh hnua English missionary Stuart K. Hine-a'n English-a a lehlin leh a ni. Hine hian chang hnih a belh nghe nghe.

Billy Graham-a rawngbawlna aṭanga rawn lar lehzual niin, BBC Songs of Praise-ah vek hian UK mipuiten an Hymn duh berte pawh a lo ni tawh bawk. A poem hming diktak hi  "O Store Gud" (O Great God) tih a ni a, Carl Boberg-a'n a phuah dan pawh hi ngaihnawm tak a ni.

UK's Favorite Hymn-ah hian mi tam tak chuan hla hlui thi thei lo, kum za tam tak liam tawha phuah vawiin thlenga mi thinlunga hna la thawk reng ṭhin chauh thlan tur niin an ngai ṭhin.

UK mipuite Hymn duh ber pa­thumna erawh 2001-a Keith Getty leh Stuart Townend-ten an phuah 'In Christ Alone' a ni daih thung. He hla music hi Getty-a siam niin, a thu tak erawh hi chu Townend-a kutchhuak hi a ni a, Ireland-a a lar viau hnuah UK a kangkai leh a, hemi hnu hian khawvel a dengchhuak ta a ni.

Kumin BBC Songs of Praise host-tu Alex Jones chuan 'In Christ Alone' chu modern hymn ropui tak, an ram mai bakaha khawvel puma Kristian-te nuna awmze nei tak tur hla a nih thu a sawi. Keith Getty chuan," List ropui taka an hla tel hi kan ngaihlu a ni. 'In Christ Alone' chanchin tak tak chu hei hi a ni, ka office-ah electric bill la pek loh ka hmu a, chumi hnungah chuan a thluk tur ka ziak a, ka play bawk a ni. Chu chu record-in Stuart Townend hnenah ka thawn leh a, thla eng emaw zat ral hnu chuan 'In Christ Alone' hi a lo piang ta a ni," tiin an phuah dan chanchin a  sawi. "He hla hmang hian hmangaihna leh muanna thuk tak Krista-ah chauh hmuh theih chu in hmuh kan beisei a ni", tiin a sawi bawk.

BBC TV-in sakhuana prog­ramme a buatsaih ṭhin niin, UK-a kohhran hrang hrangten an sak uar ṭhin Kristian hlate tihchhuahna a ni a, 1961 October thla aṭang khan an kalpui ṭan a ni. Khawvela hetiang TV show kalpui rei tawh ber zinga mi niin, hla ṭha thlanchhuah nante an hmang ṭhin.

Kumin BBC Songs of Praise special-ah hian a chunga kan tarlan pathum bakah Dear Lord And Father Of Mankind leh  Abide With Me-te chu Top 10-ah an lang bawk. Kartawp liam taah khan Lei­cester's De Montfort Hall -ah UK mipuite Pathian hla duh thlanchhuah puanchhuahna hi neih a ni a,  Alex Jones chuan a host a ni.

1. Jerusalem 

2. How Great Thou Art

3. In Christ Alone

4. Dear Lord And Father Of Mankind

5. Abide With Me

6. I Vow To Thee My Country

7. Guide Me O Thou Great Jehovah/Redeemer

8. Amazing Grace

9. Be Still For The Presence Of The Lord

10. I‚ The Lord Of Sea And Sky (Here I Am Lord)