Trump aiin Biden lakluhna inkhawm thlirtu an tam zawk

Nielsen data aṭanga a lan dan chuan Nilainia US president thar Joe Biden lakluhna inkhawm kha kum 2017-a Donald Trump lakluhna inkhawm aiin thlirtu an tam zawk.

US-a TV News outlet lian paruk aṭangin mi maktaduai 39.87-in an thlir niin Nielsen chuan an tarlang a, kum 2017-a Donald Trump lakluhna inkhawm kha mi mtd 38.35-in an thlir thung a, Trump lakluhna inkhawm aiin Biden lakluhna inkhawm entu kha 4%-in an tam zawk a ni.

CNN cover kha entu an tam ber a, mi mtd 9.9 velin an en a ni. ABC News’ cover kha mi maktaduai 7.66 velin an en a, NBC News pek chhuah chu mi mtd 6.89-in an en laiin MSNBC kaltlanga en mtd 6.53 vel an awm bawk. CBS News kaltlangin mi mtd 6.07 velin an en a, Fox News Channel kaltlanga pek chhuah chu mi mtd 2.74 velin an en bawk.