'Game of Thrones’ Prequel ‘Tales of Dunk and Egg' HBO-in Dragon tui awp keu leh an tum!

HBO chuan an series en hlawh tak 'Game of Thrones’ prequel dang siam an tum leh mek niin entertainment news lama bengvar ṭhin tak Variety chuan an tarlang.

'Game of Thrones’ hmuh-nawm zia kan hre tlang a, fan a ngah a, a tawp dan chungchanga lungawi lo pawh an tam. Tunah hian a prequel buaipuia studio lam an buai  mup mup laiin a prequel dang ‘Tales of Dunk and Egg' siamna turin HBO chuan hma an la leh ṭan tawh tih thawm a awm, GOT fan-te tan chuan thu lawmawm tak a ni tih a chiang.

George R. R. Martin novel an siam thar tur nia an tarlan hi Ser Duncan the Tall (Dunk) leh Aegon V Targaryen (Egg)-te chanchin a ni dawn a, 'A Song of Ice and Fire' hma kum 90 vela thil thleng a ni. Martin hian 'Tales of Dunk and Egg' series hi novel pathum a tlangzarh tawh a, kum 1998 khan The Hedge Knight tlangzarhin kum 2003 khan The Sworn Sword a tlangzarh leh a, kum 2010 khan The Mystery Knight a tlangzarh a ni. Heng lehkhabute hi dahkhawm kum 2015 khan 'A Knight of the Seven Kingdoms' tiin an tlangzarh bawk.

Variety chuan hemi chung-changah hian HBO leh George R.R.Martin hian engmah an la sawi chiang duh lo tih tarlangin, script writer emaw a changtu turte emaw engmah tarlan a la ni lo bawk. Tunah hian GOT prequel series tho 'House of the Dragon' an siam mek a, nakkum lamah chuan hei hi tihchhuah hman an tum. GOT khawvel hi kan la hmuh chhunzawm zel dawn a nih hmel.

‘Tales of Dunk and Egg' hi TV series-a siam turin hun eng emaw chen aṭang khan fan-te chuan an lo ngen tawh a, kum 2017-ah daih tawh khan HBO lam hian GOT spinoff an siam tur eng emaw zat an tarlan fan-te chuan an beisei hman hial a; mahse a hnu deuhah Martin chuan khatih hunlai khan a lehkhabu dang engmah film-a siam tumna a awm loh thu a sawi a ni.

Hma an la tih chuah a la ni a, an chhunzawm zel dawn leh dawn loh erawh hunin a la hril ang chu. GOT prequel series Naomi Watts channa, production eng emaw chen an kalpui tawh pawh chhunzawm loin an tawpsan tawh kha.