Netflix Korea-in ad. te ber record an siam

Netflix Korea chu Guinness Book of World Records-in an advertisement tih tet vanga World Record an siam avangin hriatpuina an hlan mauh mai! 

'Busted' finale atana magazine-a advertisement an tihchhuah chu a te hle a, 1.712 centimeter by 2.429 centimeter chiaha tein advertisement hi an ti chhuak a ni. He advertisement hi kar hmasa khan Variety-ah an ti chhuak.

Netflix Korea executive leh an agency, FCA-te chuan kar eng emaw zat chu engtiangin nge hetianga te advertisement hi print-a an tihchhuah theih ang tih an ngaihtuah tih agency co-founder Arthur Chan chuan a sawi. Vawi tam tak chu a chhuak thei dawn lo emaw kan ti hman a ni, tiin a sawi bawk.

He advertisement hi a tet em avangin mit lawnga hmuh fiah pawh a har hial zawk a, chiang taka en emaw enlenna hmang emawa en chuan mi pasarih hmuh tur a awm a, an hnunga illustration langte pawh a hmuh theih a ni.

Netflix hian 'Busted' tihlar an tum dan hi a dangdai hle a, an hlawhtling hle tih a rin thiam theih bawk. He series hi reality show leh variety showcase inpawlh a ni a, Korean celebrity pasarih murder mystery game khelhna series a ni. He advertisement hmaa advertisement te ber record lo siam tawhtu chuan 4.6 cm bialin advertisement an siam.