Foo Fighters-in album thar buaipui dawn

American rock band Foo Fighters chuan kar leh aṭangin an album thar tur an buaipui ṭan dawn.

Brazil-a kar kalta Inrinni zana Rio de Janeiro hmuna Rock in Rio music festival neihnaah, mipuite hmaah vocalist Dave Grohl chuan, "Kar lehah kan haw ang a, kan band studio album 10-na tur chu kan buaipui ṭan nghal ang," tiin a sawi.  

An drummer Taylor Hawkins chuan nakkumah an album thar tur hi an tihchhuah theih a beisei thu a sawi. Foo Fighters hi Nirvana band drummer hlui Dave Grohl din a ni a, 1994 khan an indin a ni. Foo Fighters hian hmun hrang hrangah an perform nasa hle a, tunkar hian show pahnih la hmabakin, Colombia leh Costa Rica-ah an perform ang.  

An album tihchhuah hnuhnungber chu kum 2017 September 15-a an tlangzarh "Concrete and Gold" kha a ni a, kum thum dawn hnuah album thar hi an buaipui leh dawn chauh a ni.