Prince William-te nupain Pakistan-ah royal tour nei dawn
Prince William leh a nupui Kate Middleton-te chuan October 14-18 thleng Pakistan-ah royal tour an nei dawn tih an sawi.
Duke and Duchess of Cambridge-te hi Nilaini khan London-a Aga Khan Centre-ah kalin hun an hmang a, Prince Karim Aga chuan he hun hi a kaihruai. He hunah hian Pakistan-a tour an neih tur thu hi a sawi a ni. Pakistan-a an zin hunah hian Pakistan khawtlang nunphung, hnam ziate lo entir an ni dawn a, heng bakah hian musician, chef leh artist-te pawh an hmu bawk ang.
Aga Khan Centre-ah hian William leh Kate chuan Pakistani chaw an tem chak vanga kal an ni pakhat tih sawiin, "William chuan chaw thak tak a ei thei vak lo a, in lamah chuan ka chhungten 'curry' an duh ber", tiin a siamsak fo thu Kate chuan a sawi. An fate, Prince George, Princess Charlotte leh Prince Louis-te ei tur thak loin a siam laiin amah chuan thak tak a duh ṭhin tih a sawi. William leh Kate-te hian Pakistan hi an vawikhat tlawhna tur a ni dawn a, an fate an hruai dawn leh dawn loh thu engmah an sawi lang lo.