Lauren Daigle-i'n 'You Say' hmangin record siam

American contemporary Christian music singer leh songwriter, Lauren Daigle chuan a hla 'You Say' hmangin Billboard Christian music chart-ah record a siam a, Hillsong 'Oceans' record siam a khum.

Hillsong 'Oceans' khan khar 61 chhung zet chu Christian category-ah No.1 niin record a lo siam tawh a, mahse Lauren Daigle hian kar hmasa khan hre record hi rawn khumin a zawnin kar 62 chart-ah No. 1 a ni ta a, Billboard Christian music chart-a No.1 dinhmun luah rei thei ber a ni ta a ni. He record hi khum harsa tak tawh tur a ni ngei ang.

Daigle chuan record a siam tih a hriat velah hian 'Oceans' zinkawng nasa takin ka ngaihtuah a, mi tam tak rilrua hna a thawh dante pawh ka hmu a ni. A mawi ka ti takzet a ni, tiin a sawi. "Hetiang thil hi ka tawn ka ring ngai lo. 'You Say' hi 'Oceans' tluk thei khawp tur a nih ka ring phak ngai lo a ni," a ti.

"He hla hi kan nihna min hriat nawntirtu a ni. Kan chak lohin, Ani chu a chak a, chu chuan danglamna kan nitin nuna a kenluh theih dan tur min hriatnawn tirtu a ni," tiin 'You Say' chungchang a sawi. Lauren Daigle hi hmei­chhe zingah Christian Airplay leh Adult Pop Songs-a hla nei thei hmasa ber a nih thu Christian Post chuan a tarlang.

Daigle, Paul Mabury leh Jason Ingram-te phuah niin, Lauren Daigle-i album 'Look Up Child' a mi a ni. July 13, 2018 khan tlangzarh a ni a, tlangzarh a nih hnu lawk hian  Billboard Hot 100-ah No 29 a ni nghal.

Daigle hian he hla hi Christian chart hrang hrangah No.1 a nihpui tawh bawk a, billboard chuan nikum chhung khan 'second biggest Christian song'-ah a puang hial. Kuminah Grammy award -  Best Contemporary Christian Music Performance/Song a dawng bawk a, tunah hian Billboard Christian Chart-a No.1 a ni rei thei ber record a siam leh ta a ni.

Khawthlang zaithiam lar ber zinga mi Salena Gomez chuan tunhnai khan a Instagram-ah Lauren Daigle hi fakin,"Nangmah leh i music hi malsawmna a ni," tiin a post. "A aw, a hla thu leh a music-ah hian malsawmna a awm a ni," tiin a sawi tawh bawk.