Hontrade International Ṭhazual Fakna-ah Hmingtea hla 'Isua Hmel' a mawi ber

Hontrade International Ṭha­zual Fakna chart-ah Hmingtea Chhangte 'Isua Hmel' chu No.1 a ni a, Lalremruati (Naemi) 'Intlan­siakna' chu pahnihna niin, Thawhlehnaniropuia 'I tan ka hlan e' chu pathumna a ni bawk.

Mizo Idol aṭanga Zoram mipuiten a zai kan ngaihthlak kham theih loh, tunah chuan a zai mai ni lo a lam nen lama kan thlir nin theih loh Hmingtea Chhangte chuan a hla thar ber 'Isua Hmel' hmangin Ṭhazual chart-ah dinhmun ṭha ber a rawn luah a ni.

'Isua Hmel' hla hi 'faklam'-na atan pawha an hman nasat em em a ni a, amah Hmingte phuah hi a ni nghe nghe. "Coffee Nite-a zai tura min tih ṭumin ka rilruah mi zawng zawng hian Isua hmel hi a takah hmu chak lo an awm ka ring lo a, mi fel ber leh misual ber pawhin a hmu chak ang. Chuvang tak chuan keimahah zawhna lo lutin Isua hmel hmu ta la enge a hnenah i sawi hmasak ber ang? tih rilru pua phuah chhuak ka ni," tiin Isua hmel a phuah chhan hi a lo sawi tawh a ni.

Music nalh tak mai leh lam rem tak mai hi Rpa Ralte kutchhuak a ni a, Video hmunawm tak leh Audio Recording hi The Bigas Production kutchhuak a ni bawk. Video hi a hmuhnawm hle a, concept hrang hrang hmuh tur a awm a, en a manhla hle a ni.

Lalremruati (Naemi) rawn 'come back'-na hla 'Intlan­siakna' chuan hma a sawn zel a, pahnihna dinhmun rawn luah tawhin eng chen nge a thlen zel dawn tih chu hriat chakawm tawh tak a ni. Naemi hi hun rei tak a reh vang vang hnuah rimawi khawvelah a rawn inlan leh a ni a, Zoram mipuiten a zai kan la ngaithla kham lo tih a chiang.

Chart hmasaa pakhatna Thawh­lehnaniropuia 'I tan ka hlan e' chu pathumna a ni ve thung a, Sawmtea chuan a hla thar 'A va mak em' chu hma rawn sawnpui zelin palina a ni ve bawk. Lalthlengliani 'Jo­hova Elo­him' chu pa­ngana niin chart top 5 khartu a ni.

Tunṭum chart-ah hian hla thar inlan an awm nual a, chungte chu- R. Lalruatsangi  'Chanchintha hril', Sanga ft Hlimhlimi 'Ni ropuiah chuan', Ruthi CVL Muanpuii 'Lalpa nang hnaih zel hi' leh Ruatpuii 'Ka lawm e Lalpa'-te an ni a, dinhmun sang zawk luah thei tur hla ṭha vek an ni bawk a, an thlen chin hriat a chakawm tawh hle a ni.