Ronnie James Dio Documentary siam a ni dawn
Rainbow leh Black Sabbath vel tuipuitute tana thu lawmawm tur tak BGM media company chuan a rawn chhawp chhuak a, heavy metal legend fam ta Ronnie James Dio documentary film an siam dawn tih Thawhlehni khan an sawi.
BGM hian Dio chhungte phalna thlapin a documentary film hi an siam dawn a, heihi a laina hnaite phalna la thlapa Dio documentary hmasa ber tur a ni. Pawisa tumtu bakah executive producer an ni nghal dawn a, Don Argott leh Damian Fenton-te chu hma latu ber an ni bawk.
Video footage leh thlalak la tlangzarh ngai loh hnuh tur a awm nual dawn a, hengte hi Dio archive-a mi lakchhuah a ni a, a chhungkhat lainate leh a ṭhiante nena an thlalak hlu tak takte pawh tihlan a ni bawk ang.
He film hian Dio autobiography la zawh loh chu an rawn zawhsak dawn nia tarlan a ni a, a autobiography a buaipui mek laiin Dio kha a thi a ni.
Rock legend Dio
• Rock band lar tak tak Elf, Rainbow, Black Sabbath, Dio leh Heaven & Hell-ahte frontman a ni ṭhin.
• 'Sign of the horn/metal horn' tilartu nia hriat lar a ni bawk.
• Kum 1979 khan Ozzy Osbourne thlakin Black Sabbath a zawm.
• Kum 2010 khan pumpui cancer vangin a thi.