Cassettes hla thar 'Inkâr'

'Engtin nge ni dawn?' tih hla hmanga Mizo mipuite thiam taka min awi tawhtu Cassettes chuan vawiin hian an hla thar 'Inkâr' chu an tichhuak dawn.

Tunlai ṭhalaite duhzawng tak hla a ni leh dawn a, inngaizawngte chauh ni lo, nupa ni tawhte tan pawha ngaihthlak manhla tak tur a ni ngei ang. "Inngaizawng te emaw, nupa emaw inkara inhauh leh inkhakna awm ṭhin hi, hmangaih tak taktu ka aṭanga a chhuak a nih chuan duhsak leh a ṭha lam duh zawkna vang a ni ṭhin," tiin Cassettes vocalist Hlimpuii chuan an hla thar tur chungchang hi Vanglaini a hrilh.

An hla hmasa 'Engtin nge ni dawn?' tih khan viewer maktaduai 2.8 chuang a nei a, Mizo music video-ah chuan thlirtu ngah ber zinga mi a ni hial. 'Inkâr' pawh hi a hit leh viau a rinawm a, a nghahhlelhawm hle a ni. Music video hi Reuben Lalmal­sawma buaipui sak niin, vawiin tlai dar 5 hian Reuben Lalmalsawma YouTube channel lamah thlira ngaihthlak theih turin chhawpchhuah a ni ang.

Video hi Delhi lama shoot a ni a, hmuh a nuam leh viau dawn tih a hriat. An video hmasa ang tho khan a video hi a 'light' leh viau dawn a, Delhi lama lehkha zir emaw hnathawhna avang emawa awm tawh ṭhinte leh awm mekte tan chuan 'relate' theih deuh tur video a ni dawn.

'Inkâr' hi an guitarist Rinnunga phuah a ni a, Recording hi Biaka, Kings and Prophets buaipui sak a ni bawk. Cassettes hian nakkum kum tir lamah hian sap hla tihchhuah an tum leh bawk tih Hlimpuii chuan sawiin, hmun hrang hranga awm an nih avangin engtikah tak nge tih erawh a la sawi thei lo thung.

An video hmasaah khan an vocalist-te chu hmuh tur awm mah se, tute nge an nih kan lo hrechiang lo mai thei. An vocalist-te kha Hlimpuii HT leh Hadasi-te an ni a, Rinnunga leh Gabby-te chu guitarist an ni bawk.