World Vision-in Hlimhlimi contract ziahpui

MDM Artist zinga mite hriat hlawh ber pawl, 'Ṭhian Rin­awm' mawi tak maia satu H. Vanlalhlimpuii (Hlimhlimi) chu World Vision-in contract a ziahpui.

Influencer Marketing Agen­cy, Viral Nation, Canada-in Hlimhlimi hi bepawpin, anni hmalakna hnuaiah hian World Vision nen hian contract hi an ziak ta a, nimin khan International Day of the Girl Child pualin a vawikhatna atan an contract hnuaiah hian campaign hi an nei nghal.

Viral Nation hian September thla tawp lam khan Hlimhlimi hi an bepawp ṭan a, October 5 khan contract hi an ziahpui ta a ni. An contract siam hnuaiah hian Hlimhlimi hian Instagram-a a thil post aṭang hian hlawkna a dawng thei dawn a, mahse a duh duh erawh a post thei dawn lo thung. World Vision-in a thil post tur an phal chin leh an hriattir ang chin zel chauh a post thei dawn a, story a update emaw, post pangngai a siam emaw apiangah hlawkna erawh a dawng dawn a ni. Hlimhlimi hian an contract rei tur zawng erawh hi chu a la hre bik lo tih Vanglaini a hrilh.

Nimina a thlalak a post tur ringawt pawh khan ṭum 100 vel zet an la a, Jeremy Hauhnar chuan ṭanpuiin, thlalak tam tak an lak zingah hian World Vision lam hian post tur bik hi an lo hrilh leh a, a in pose dan pawh kha 'fearless girl pose' an ti deuh kher bawk.

Thlalak a post tura a hashtag tur zawng zawng pawh World Vision lam hian an hrilh vek a, ram ṭhang meka cheng hmeichhe naupangte tana campaign-na hmanruaah Hlimhlimi hi an hmang a ni. World Vision hian kumin chhung ngei hian hmeichhe naupang 1000 sponsor an nih theihna turin hma an la a, a hrechiang duh chuan Hlimhlimi instagram bio-a link bit.ly/WorldVision_Hlimhlimi -ah a enfiah theih bawk.