Khawvela thil nung lian ber 'fossil' an hmu chhuak?

Mithiamte chuan Argentina-ah dinosaur chi khat 'Titanosaur' fossil lian tak mai an hmu chhuak a, an thil laih chhuah hi a lian hle a, khawvela ke a kal tawh thilnung zinga lian ber niin an ngai. An thil hmuh chhuah hi kar hmasa khan Cretaceous Research journal-ah an tlangzarh a, media hrang hrangin an ngaihven nghal hle.

Paleontologist-te dinosaur fossil hmuh chhuah hi kum maktaduai 98-a upa nia ngaih niin Argentina hmarthlang lam Neuquén Province hmuna an laih chhuah a ni a, a chhah ṭhain Candeleros Formation-in a awm niin an sawi. A vertebrae 24 bakah pelvic leh pectoral girdle an hmuh chhuahte aṭangin 'Titanosaur' ni ngeiin an hria. Titanosaur hi dinosaur chi khat, lian tak, ngawng leh mei sei tak nei, ke pali nei chi an ni.

Cretaceous Research journal an tlangzarhah hian an thil hmuh chhuah hi khawvela sauropod lian ber zinga mi a nih thu tarlangin kum maktaduai 100-95 inkar vel liam taa cheng ṭhin Patagotitan aiin a lian zawk mai thei niin an tarlang.

Argentina Museo de La Plata palentologist Alejandro Otero chuan CNN hnenah an thil hmuh chhuah chungchang hi hrilhin,"Dinosaur lian tak a ni a, a luhruh tam zawk hmuh chhuah leh kan beisei, chumi hnuah chuan a len zawng chiang zawkin kan la sawi thei ang," a ti.

Titanosaur fossil-te hi khawvel hmun hrang hrangah hmun an ni ṭhin a, mahse a lian tak tak ho chu tuna fossil an hmuh chhuahna hmun Patagonia-ah hian an hmu chhuak tlangpui a ni.