Talk Show legend Larry King a thi

Emmy award hial dawng thei TV host lar Larry King chu kum 87 mi niin Inrinni khan a thi. A thih thu hi a official Twitter account-ah an ram huna Inrinni zingah khan puan a ni.

"Lungchhe tak chungin, Ora Media chuan kan co-founder, host leh kan ṭhian Larry King thih thu a puang a, tukin zingah khan kum 87 mi niin Cedars-Sinai Medical Center, Los Angeles-ah a thi a ni." "Radio, television leh digital media platform-ahte kum 63 chhung tehmeuh mai Larry hian interview sang chuang a ti tawh," tiin an tarlang.

Time Magazine-in 'Master of the Mic' tia a sawi hial King hi mi tam tak chuan CNN aṭangin an hre awm e, kum 1985 June thla aṭang khan CNN-ah Larry King Live show a host ṭan a, UFO conspiracy theory leh physics chungchanga mi hrang hrang a kawm ṭhinte chu a larpui hle. Kum 2010 thleng khan CNN-a a show hi a host a ni.

CNN chief leh WarnerMedia head of news and sports Jeff Zucker phei chuan CNN international stage-a pholangtu a nih thu a sawi hial. Film lar tak takah pawh a cameo hmuh tur a awm nual a, “Ghostbusters” (1984), “Dave” (1993), “Primary Colors” (1998), “Enemy of the State” (1998), “America’s Sweethearts” (2001), “Shrek 2” (2004) leh “Shrek the Third” (2007)-ahte khan a inlan a ni.

USA Today-ah kum 20 chhung tehmeuh mai columnist ni bawkin, media khawvelah chuan ani aia sulhnu hnut chhiat tam hi an tam bik lo hle ang. Media khawvelah tal na hle mah se King hian journalist tia sawi aiin interviewer nia sawi a duh zawk niin Variety chuan a tarlang. King hian nupui pariat a nei hman a, fa panga leh tu pakua a nei bawk.