21st Century-a album hralh ṭhat ber '21'

BBC Radio 2 chuan kum zabi 21 chhunga UK-a album hralh ṭha 40 a puangchhuak a, chung zingah chuan Adele album '21' khum zo reng an awm lo.

Adele '21' hi copy makta­duai nga chuang zet hralh a ni a, 2011 a tihchhuah daih tawh kha ni mah se ani aia hralh tam an la awm lo a ni. '21' a hla ho zawng zawng hi a hit em em vek ti ila kan sawisual lo ang, 'Rolling In The Deep' leh 'Someone Like You' awmna album aia hralh ṭhat hi tun kum zabi kan hman mekah hian a la awm lo a ni.

Adele hian '21' album production a buaipui ṭan tirh lai khan kum 21 chiah a la nih avangin a album hmingah pawh hian '21' hi a hmang a ni. January 24, 2011 khan a tlangzarh a, a hnulam erawh sawi thui vak ngai loin khawvelin tunge Adele chu a ni tih an hre chhunzawm ta bawk.

'21'-ah hian Adele hi a la lawm tawk lo a, a album tho '25' chu album hralh ṭhat lamah pathumna a ni phak bawk a ni.

Pahnihnaah hian zaithiam famta, Jazz leh Soul lam thiam em em maia sa ṭhintu Amy Winehouse album 'Back to Black' chu a awm thung a, Mizo tam zawkina kan rilrem pui loh music hi khawthlang mite khu chuan an lo tuipui viau zel tih a hriat.

Ed Sheeran hian a Top 5-ah a album pahnih 'multiply' (x) leh 'divide' (÷) chu a lanpui a, 'x' hi palina niin '÷' hi pangana a ni bawk. Ed Sheeran hi a larna a rei lutuk loh ngaihtuahin leh a album tlangzarh hun ngaihtuah chuan a album hi a hralh hnem rem rem hle a ni.

A chunga kan han tarlan bakah hian James Blunt, Leona Lewis, Michael Buble, Dido leh Davida Gray-te pawh Top 10-ah an lang phak. Top 20-ah chuan Cold Play, Kings of Leon, Lady Gaga leh Scissor Sisters-te pawh an lang.

BBC Radio 2 hi BBC flagship national radio station pahnih zinga pakhat a ni a, UK-ah chuan station lar ber niin, kar khat chhungin mi maktaduai 15 velin an ngaithla ṭhin anga chhut a ni. Radio 2 head of music Jeff Smith chuan album hralh ṭhat zual 40 zinga 70% zet chu British mi an ni tih sawiin, tualchhung chhuak music chu an ram mipuiten an ngaihluin a la lar hle tih a sawi.