No.1-ah Dj-i 'Khuarei an'

Hontrade Interna­tional Ṭhazual Lengzem chart-ah DJ Lalvenhimi hla 'Khuarei an' chuan thlan hlawh berin chart hmahruaitu a ni a, Lawmi Khiangte 'Love at first sight' chu pahnihna niin, Essy hla thar 'Kan hawi kir lo'ng' chu pathum­na a ni bawk.

DJ Lalvenhimi hi tu­nge a nih sawi nawn ngai lo khawpin Zoram rimawi khawvelah chuan hriat a hlawh tawh. A hla apiang hi a 'hit' em em vek zel mai a, kum ruk liam ta vela 'Inṭhen lo'ng' tih hla a tihchhuah aṭanga a hla thar ber 'Khuarei an' tih thleng hian mi­puiin an duh em em zel mai a nih hi.

A hla thar ber 'Khuarei an' tih hi August thla chawhnu lama a tihchhuah kha a ni a, a tihchhuah hnu lawkah Ṭhazual chart-ah lang nghalin chart-ah a mikhual lo zui hle. He hla hi Rpa Ralte phuah a ni a, a video hi Mumbai lama shoot niin Danny Murray-a'n a shoot sak a, Aizawl lamah Andrew-a'n a lo chul mam leh a ni.  A hla a nalh bakah a satuin a sa thiam bawk a, thlan a hlawh pawh hi a mak lo.

Dj-i hian  nikum lama a channa 'Ni thar duhawm', musical film chu ama YouTube channel lamah en theihin a chhawpchhuak leh bawk a, hei pawh hi hmaih phal chi a ni lo ang.

Lawmi Khiangte-i'n MPL Kick Off zana a tlangzarh, a hla thar ber 'Love at first sight' chuan thlan a hlawh zel a, Ṭhazual lengzem chart-ah pahnihna a ni der tawh. Essy pawhin a hla thar 'Kan hawi kir lo'ng' chu hma a sawnpui zel a, chart-ah pathumna a rawn nihpui mek bawk a, anni pahnih hi an dinhmun a ṭha chho zel a nih pawhin thil mak a ni lo ang.

Jonathan Lalengzauva 'I tan ka hmangaihna' chu palina niin Ticos Dara 'Lunghlu' pawh panganaah a rawn invawrh ve bawk a ni. Ṭhazual lengzem chart-a Top 5-te hi Mizo Idol chhulchhuak vek an ni nghe nghe a, hei hi Mizo Idol hlutna tak pawh a ni ti ila kan sawisual awm lo e.