Ed Sheeran-a'n a in ṭawngṭaina hmunah siam tum

Vawi li lai Grammy award lo la tawh Ed Sheeran chuan Fram­lingham, England-a $mtd 4.5 hu a in chu, sakhaw hrang hrangte tan ṭawngṭaina hmuna siam a tum thu architectural firm chuan an tarlang. 

The Sun chuan Ed Sheeran in hi chhawng hniha sang a nih thu leh darthlalang tukverh leh tower a awm mai bakah, lawng pian hmanga sak a nih thu an tarlang. Ṭawngṭaina hmuna siam a nih theih nan, East Suffolk local council hnenah kar kal ta khan phalna an dil a, tunah hian nghah mek a ni.

Sheeran chuan a in hi sakhaw hrang hrangte ṭawngṭaina atan te, inneihna hmun atan te, chhung­kuain bul an ṭan ṭhat duh huna an intuaithar lehna atan te, hah­chawlhna leh khawvel hmun hrang hranga sakhua tam takte'n an rinnate an tihlan theihna atan siam a duh thu a sawi.

A tir chuan chapel-ah siam a tum phawt a, mahse thuneituten an phal sak lo. Ṭawngṭaina atan siam a nih theih nana local council hnena dilna document pawimawh an thehluhah hian, a in hi ni chhuahna lam, khawchhak hawi zawng a nih avangin; ṭawngṭaina atan a rem em em thu a ziak lang a ni.