Joker a la hlawhtling zel

Box Office-ah Joker (2019) khum zo an la awm lo a, a la hlawhtling chhunzawm zel. The Addams Family (2019) chu sum lalut tam ber dawttu niin, Gemini Man chu sum lalut tam pathumna a ni bawk.

Chart hmasaah khan US bikah $maktaduai 96 chuang zet lalutin sum lalut tam ber a ni tawh a, tunah pawh hian $55,861,403 zet lalut lehin khum thei an la awm lo. Jaoquin Phoenix channa Joker hian lawm a hlawh hle a, a en tawhtu tam tak zingah 'villain' mah ni se khawngaihtu an tam hle. Batman-a hmelma lian ber hian hawtu aiin lainattu a ngah zawk mah tih a film 'comment'-tu tam tak en chuan a hriat theih. Hei hi la en ve lote tan pawh en ti chakawm zualtu a ni ngei ang.

Kar liam taah khan theatre 4,374-ah chhuah niin, a kar hnihnaah pawh hmuhnawm titu an la tam hle a, khawvel puma a sum lakluh tawh chu $mtd 548.3 zet a tling tawh a, kumin film chhuak zinga hlawhtling ber pawlah a inhlangkai der tawh.

DC comics behchhana film siam hi an vanduai theih ṭhin viau laiin Joker erawh hi chuan lawm a hlawh a, Arthur Fleck, misual a nih chhoh dan leh rilru danglam tak a putchhoh dan tarlanna film hi a hmuhnawm hle a ni tih thup rual a ni lo.

Kum 25-35 bawr vel chuan Addams Family hi tute chhung­kua nge an ni tih an hre tlangpui awm e. Cartoon Net­work hit chhoh tak tak laia en hlawh ber pawl zinga mi, The Addams Family chu Conrad Vernon leh Greg Tiernan-te chuan direct-in  3D computer-animated film-in an rawn siam thar leh a, khawthlang lamah chuan a tlana leh nghal hle.

He film-a aw thawhtu hi an hrawl a, chung zingah chuan Oscar Isaac, Charlize Theron leh Snoop Dogg-te pawh an tel. Anni chhungkua hi an hrang hmuhnawm dangdai leh hle a niang, kar tawp liam taah khan $mtd 30 chuang zet sum an lalut a ni.

American action thriller film, Will Smith-a channa hi Zirtawpni liam ta khan US-ah tlangzarhin $mtd 20 chuang a lalut nghal. The Addams Family leh Joker tluk zo lo mah se sum lalut tam pathumna a ni phak tho a ni. Chart hmasaa pahnihna Abo­­minable chu palinaah tla thlain, pakhatna pawh lo ni tawh Downton Abbey chu pangana a ni bawk.

Tun ṭum chart-ah hian film thar a awm nual a, The Addams Family leh Gemini Man bakah hian Jexi chu pakuana niin film thar pathum top 10-a lang phak an awm a ni.

1    Joker (2019)    $mtd 55

2    The Addams Family (2019)    $mtd 30

3    Gemini Man    $mtd 20

4    Abominable    $mtd 6

5    Downton Abbey    $mtd 4

6    Hustlers    $mtd 3.8

7    Judy    $mtd 3.2

8    It: Chapter Two    $mtd 3.13

9    Jexi    $mtd 3.10

10    Ad Astra    $mtd 1