Lauren Daigle-in Award dawng hnem ber

50th annual Gospel Music Association’s Dove Awards chu an ram huna Thawhlehni zan khan  Nashville, Tennessee-ah sem a ni a, Lauren Daigle chuan award dawng hnem berin 'artist of the year', 'song of the year' leh 'pop/contemporary album of the year'-te a dawng.

Grammy award pawh lo dawng tawhtu kum 28 mi Lau­ren Daigle a cheṭha hi a mak lo a, kum thum chhunga a ṭumhnihna atan 'artist of the year' a dawng leh thei hi a ropuina tak pawh a ni.

Daigle hian a hla hit 'You Say' chu song of the year a lakpui thei a, hei hi thil awm tak pawh a ni. He hla hmang hian Billboard Top Christian chart-ah hmanni lawk khan record a lo siam tawh a, Hillsong 'Oceans'-in No.1 ni rei thei ber record a lo siam tawh chu khumin kar 62 chhung Chart-ah No.1 a nihpui thei kha a ni a, 'song of the year' a dawng hi thil mak a ni lo. Chumai a la ni lo, 'pop/contemporary album of the year' award a dawng leh bawk a, nikuma a album tihchhuah  'Look Up Child' hmangin he chawimawina ngaihhlut hi a dawng. 'Look Up Child' pawh hi  Billboard 200 all-genre chart-ah No. 3 lai a lo nihpui tawh ngat kha a ni bawk.

"Mi tam tak min thlawpna hmuh hian, tihtak zetin min khawih a ni," tiin 'song of the year' award a dawn hnu hian a sawi.

Grammy award 13 lai dawng tawhtu Kirk Franklin chu Dove Awards-ah hian a cheṭha lehpek hle a- 'Gospel Artist of the Year' a dawn bakah a hla 'Love Theory' chu 'Contemporary Gospel Recorded Song of the Year' award a lakpui bawk.

2019 GMA Dove Awards-ah hian 'Aaron Tyrese Cole', Aaron Cole tia hriat chuan 'New Artist of the Year' a dawng. Ani hi hip-hop artist a ni a, 'Right on Time' leh 'One More Day'-te a larpui hle.

Hillsong UNITED chuan an album 'PEOPLE' hmangin Worship Album of the Year an dawng a, Phil Wickham pawhin a hla 'Living Hope' hmangin 'Worship Recorded Song of the Year' award an dawng ve bawk. Hillsong music publish tho Ben Fielding leh  Reuben Morgan-te hla 'Who You Say I Am' chu 'Worship Song of the Year' hlan a ni bawk.

Billy Graham-a rawng­bawlna aṭanga kan hriat lar Gaither Vocal Band-te pawhin an hla 'I Know I'll Be There' hmangin 'Southern Gospel Recorded Song of the Year' award an dawng a, 'Southern Gospel Artist of the Year' an dawng bawk a ni.

DC Talk member hlui leh Gospel rapper lar 'TobyMac' chuan 'Contemporary Christian Artist of the Year' a dawng thung. Box Office lama cheṭha tak 'Breakthrough' chuan 'Inspira­tional Film of the Year' award dawngin, film lama chawimawina ngaihhlut a dawng a ni.

Artist of the Year    : Lauren Daigle

New Artist of the Year    : Aaron Cole

Worship Song of the Year    : Who You Say I Am, Hillsong Music Publishing

Contemporary Christian Artist of the Year    :TobyMac

Gospel Artist of the Year    : Kirk Franklin

Song of the Year    : You Say, Lauren Daigle

Southern Gospel Artist of the Year    : Gaither Vocal Band

Inspirational Film of the Year    : Breakthrough

Pop / Contemporary Recorded Song of the Year    : God Only Knows, for KING & COUNTRY

Gospel Worship Recorded Song of the Year    : This Is A Move (Live), Tasha Cobbs Leonard

Rock / Contemporary Album of the Year    : Native Tongue, Switchfoot

Contemporary Gospel Album of the Year    : Unstoppable, Koryn Hawthorne

Worship Album of the Year    : PEOPLE, Hillsong UNITED

Southern Gospel Recorded Song of the Year    : I Know I'll Be There, GVB

Contemporary Gospel Recorded Song of the Year    : 'Love Theory', Kirk Franklin

Rap / Hip Hop Album of the Year    : Let the Trap Say Amen, Lecrae & Zaytoven

Pop / Contemporary Album of the Year    : Look Up Child, Lauren Daigle

Worship Recorded Song of the Year    : Living Hope, Phil Wickham

Choral Collection of the Year    : The Great American Church Songbook